Auleria Wakudumo
Omukulunhu wopolifi moshitukulwa shaShana, Commissioner Naftal Lungameni Sakaria okwa kumaida ovashingi voihauto va xulife po okushinga ve li koshi yodungo. Ovashingi ova indilwa va dengele opolifi ile ovashingi vamwe opo va twalwe komalukalwa avo.
Sakaria eshi okwa ti otashi kwafele okukeelela oiponga meendjila, okutulwa moipandeko kopolifi nekanifo leemwenyo.
“Ohashi pula oshimaliwa shihapu okulongifa omadidiliko omeendjila oo a hanaunwa po kovashingi voihauto,” Sakaria ta ti.
Omukulunhu wopolifi okwa holola kutya ovashingi voihauto ve li koshi yodungo ve li 41 ova tulwa moipandeko moule woivike ivali.
Sakaria okwa ti ovashingi o22 ova tulwa moipandeko mexuliloshivike la dja ko omanga o19 va kwatwa po mexuliloshiovike likwao.
“Otwa didilika omwaalu wa uka ashike pombada. Otwa didilika yo kutya vahapu ohava shingi nouhasha mexuliloshivike shaashi ve li koshi yondungo,” Sakaria ta ti.
Sakaria okwa weda po ta ti inashi puka ngeenge omukwashiwana a dengela opolifi opo yi mu ile ponhele yonhumba molwoukolwe. Okwa ti opolifi alushe oye lilongekida okukwafela ovashingi ve li monghalo ei.
“Ohandi dimbuluka odula ya dja ko opolifi ya ifanwa komusamane a li monhele yoipindi mOndangwa nounona vaye opo a twalwe keumbo shaashi a li a wanifa.
Opolifi oya shinga otuwa yaye nounona vaye ndele tai mu twala keumbo laye,” ta dimbuluka.
Sakaria okwa ti ngeenge eumbo oli li kokule, opolifi otai dulu oku ku twala popepi noshitaasi shonhumba manga to kala po nawa opo u twikile nawa okushinga.
“Ohatu indile yo oshiwana unene ovalumenhu opo va xulife po okutauluka omeva va kolwa. Eshi oshi li sha nyika oshiponga unene shaashi iho ka dimbuluka vali apa pe na elambo lile naapa hapa taulukilwa omeva,” Sakaria ta ti.
Moule womwedi umwe, Sakaria okwa holola kutya oshitukulwa shaShana osha didilika ovanhu 15 lwaapo va xulifa komeva.
Momwaalu omu omwa kwatelwa ovakulukadi vavali ovo va li tava kendabala okutauluka omeva okudja koundingosho osho yo ounona va li tava yowo mondobe yomeva.
Pefimbo eli ovadali ova pumbwa okufiila oshisho ounona, okuya nokudja kofikola osho yo eshi ve li meumbo.
Sakaria okwa ti nonande omwaalu wovashingi ve li koshi yodungo wa uka pombada, opolifi onghene tai twikile okukwashilipaleka kutya keshe ou a hangika ta shingi a kolwa okwa tulwa moipandeko.
-wakudumoauleria@gmail.com