Nangawri oviungura tjiva kouye wopendje, nu tjinene komahi tjiva wa Asia, kapomba pu vi heewa nokuzuvakera kokure omundu ngunda au hi ya tuka okukavaza kehi ndo roharive ku vya korwa.
Ovanamibia tjiva katjisupi otja tji ve kerimunine oveni tjinga ava karirire ovomorupanda, ovahangauke, ovahene novatupuke ngandu tji va kamunine ondjamo komberoo yomukuramenepo wa Namibia mehi ndi Omalaysia. Tjapo nganda ave munu ouṋingandu woukarata wonḓera okukotoka konganda kehi yombatero yovakwao momahi tjimuna Ounited Kingdom, Okanada nEhi rOvandoitji
Ovo va kamuna kutja nangwari oviungura kehi ndi Olaos ku va ya nangwari kavyo mbi imbi mbi va nangarasi tjinga ava kamuna kutja oviungura imbi ovyetiku na vyarwe vyokurandisa ovipurukise novakazendu okurirandisa komara.
Ongaro ohazendu ndji ndja sana nokurandisa ovandu i ungurirwa pehuri na mehuri ra Namibia i yozohoroose nḓe paha ovaungure mOnamibia kehi yotjiwova tjokutja ku noviungura kuwo komahi wopendje. Imba mbu ma kuzu oovevepe voviungura pu ve vesutira oukarata wokutuka monḓera okuzamo uriri nungwari mu nokuhina okukotoka mehi. Kutja tji va zu nokutuka okuyenda pendje kehi roharive indo nave kamuna kokutja nangwari oviungura mbya hewa imbi kambi ri vyo, ave ha kara noupupu wokukotoka.
Kutja pe notjiṋa tjimwe poo tjarwe tji tji he ri nawa tji mave tuka kave tukire okuza mOtjomuise porutjandja ronḓengu youye romatukiro wozonḓera indwi Ohosea Kuṱako nungwari rutenga ve rondisiwa mozombesi ngandu kOsouth Afrika poo Oangora ku ve katukisirwa.
Ouhazendu mbwi wa tjiukisirwe mu Keetute Oritjavari, i umwe waimba mba kakara mouzeu imbwi okuza nokuyenda kOLaos, ehi koutjiro okupikira komamuho wa Asia okukaungura ingo poo kehi yongamburiro yokutja wa munu oviungura ma kaungura ngo. Posi ya eye novakwao ave karira ovahangauke, ovatupuke novahene koveveungurise. Oministera yOkehi yOngaro Pokati Komahi, Jennelly Matundu, opu ma raisire ohepero ya kangamwa Omunamibia auhe ngwe kerimuna momahi wozonganda, okupaha omberoo yomukuramenepo wa Namibia mehi ndo nokuritjangisa kuyo. Ma tja omeritjangisiro inga maye rire ohepero nombatero ku imba mba kakara mouzeu momahi pekepeke.