“Tjike okuza kOruvanda kOkatutura? Hapo kangaro imwe mokutja twa undurirwa ingo? omuture umwe wa Eiseba posi ya ngwe kurira mEpukiro ma tja. “Hi nokumuna omaheya wokunyandera kangamwa tjOkomisi ya Ondendara. Yari ondjito ondjuukwa ohinambinḓu komutima nomatombero wousemba wovandu,” Sandi Tjaronda ma tja. Ama tja nga kundindoni ya sere okumunika mombepo ndjo.  Na kumwa kutja hapo okunyandera ozombura esere za tjike ngunda ape nondjuriro nokuhinomekurisiro nokuhinomuhunga?

“Ounahepero tjinene orondu tji matu riteza kutja twa za pi nu atu i pi moruveze ndo,   ovandu tji mave piti motumbo omuhoko wOvambanderu,” Orata Uakuzako Kavari ma tja. “Okuundurwa katjiṋa otjipe koundu orondu nandarire otja Korukarorwa twa rambwa motjikunino tja Edena. Epukiro ra tutumununa onḓengu yetu otjotjiwaṋa poo ovahuke vomuinyo kOtjiṱiro Otjindjandja tji tja karere ko.  OmEpukiro ovakuru vetu mba hupa mu va woronganisira rukwao ouṱuta, ave tutumuna ombazu yawo nu ngahino mu ve ritezera otjoo Kaviṱondema vyOtjiṱiro Otjindjandja,” Collin Marenga Omumbanderu omukwatera wa Pukiro ma tja ama munu ohepero tjinene yokuzemburuka ozombura esere nḓa. 

“Epukiro ra za morutjindo oruzeu rovakuru vetu nu twa sere okuvepa ondjozikiro,” Elia Tjiunomuinjo Kavari, wina omuture ma tja. “Mokuzemburuka wina matu nyandere okupanḓera kOotate Ovakuru nokuyenena kwawo nandarire mondjuriro ndje ve hungamene,” Charles Uhupuavi Katjivirue ma tja. Na weza ko kutja owo otjeri ovandu mba zeya okuti onguza kwa Kalahari kutja ndinondi i rire okuti ovandu mu mave yenene okutura katjiṋa otjiṱiṱi kaparukaze. “Mba temwa kutja tjii hapo tjikweya komekurisiro/omairo wokomurungu tu nomukee tongatima mbu tu nawo?’ Nḓanduu Ngaruka.