Imwe yozonganda ozondjiukwa mOtjomuise na mOnamibia arihe momasekirisiro nomayakuriro wovayenda Oroviungura ndazuko ya sekirisire otjitjitwa otjihimangongo.
Nandarire ndatemisire nokuhurukisa ingwi ongurova ndjo ngwari eingi raimba mbe mu pere ondjozikiro yapeke neriro ehona indo. Oyo itjiukwa Otjomututu wa Afrika, “Roof of Afrika”, momaturiro wa Tjomuise inga Oerosa. Ozomiṱiri za virikizire Kaunomuinjo Mbaeva, imwe yozonongonongo zeraka rOtjiherero mOnamibia. Ngwa senine ponganda indji Onational Institute for Educational Development, ousupi ONIED, otjOtjiuru tjOmaraka.
“Ami momuinyo wandje hi ya rora okutjitirwa otjiṋa otjinene tji tji ṱa mba. Otjikando otjitenga,” Mbaeva wa tjere nao. Ovanaakwetu ngaave hakahana okutwara ku indi eriro rozonḓiyona nda heewa. Kako Mbaeva kaatjiṋa otjinene atjiyerike ozomiṱiri tji ze mu tjitirire. Wina wa perwe ongombe ondema nondwezu ombosimara (bonsmar) i yomutengwa Vetumbuavi Mungunda
Ze yere azehe mounyaṋu wazo okuza komikuma pekepeke vyehi kuze tunduuzira no ku tunḓuuzira ovahongwa. Korusenina okuyekuzuva kokutja onongo yeraka, meyuva ndi hapo mai ve sa nekee mbo poo ondunge ohunga neraka razo. Naze raisa tjotjiri kutja ozo ovandu mbe kurama komurungu yozonḓiṱona na ze rizara okuyandja otjihorera tjimuna rukuru omiṱiri tjaai munikire kozombanda nḓu ya zara kutja nangwari oyo ouṋe.
Eriro rari mozondya ndatu, oongundarora nokurongerisa omate motjinyo kutja tji kwa zu kwee oviriṋine tjiri mbyari oviriṋine. Otja pondondo youye nu wina ponganda ndja katuwa pehi momayakuriro wovayenda mu kangamwa omuhingo. Kutja okaṋa pehuri poo okokunwa. Okuutira pokaṋa kokuuta nako, ngandu periro orini enene rongurova nokupata nouṋa imbwi mbu he kutisa. Kutja we ripakere pu pe ṱa pi rukuru, aruhe owo mbu nopoṋa pu u hita au ha hepa oruveze.
Kovanaakwetu ovakweyuva novanaakwuati onyama opu yari pekepke nganduu komaterekero wayo.
Mbaeva Oumiṱiri wa uta mo-1986 mOtjombinḓe po C Heuva. Wa kahonga kEpukiro kOkovimburu pu na Miṱiri Ndjavera ka kamwina ongongo yourenga mbu kara nomiṱiri. Ehi tji mari kutuka wa yaruka kosikore o Academy mu mwe yekuza o University of Namibia (Ounama) na mana ondingirii ye ondenga o Bachelor of Arts (BA) mOtjiherero nOmakuruhungi kehi, umwe wawo, Onongo Jekura Kavari.