Harukuru, tjandje ozondekurona zOtjiṱiro Otjindjandja mOtjauana za utu okurya omatamana yevari tjikweya keraka tjinga mOtjiherero, nai ombuze omueze imbwi mu ya utire okuresewa motiivii, wina ama ku weziwa Otjimbanderu. Otjo wina mu ma mu utu okuresewa ombuze motiivii yehi ndo.

Epu reraka rozondekurona kutja Otjiherero poo Otjimbanderu ra yendayenda mayuva mehi ndo okuza indu tji pa patuka ombata, onganda yomahongero wokombanda mehi ndo tji ya raisa ondando nonḓero yokuuta okuhonga eraka rozondekurona mehi ndo kehi yOtjiherero/Otjimbanderu. Tji tja pendura eyeye okuza mozondekurona ozeni mehi ndo ngandu mOnamibia. Tjiva mbaave munu kokutja eraka ngaarire poo okutjiukwa otjOtjiherero/Otjimbanderu. Otjiherero ngarire Otjiherero kutjo otjini nOtjimbanderu Otjimbanderu kutjo tjini aye ha kutwa nokumangwa mumwe tjapo ngaaririre Otjiherero/Otjimbanderu.

Ngunda omavingururasaneno nomapingahasaneno amaye kayenda otiivii yehi ndo ai utu ombuze mOtjiherero mu ya utire okuresewa omueze mbwi mehi ndo. 

Nai katjisupi omueze imbwi pa pitire omatjiukisiro wokotjiveta okuza kotjiwaṋa ngu maye paha ovarese vombuze mOtjimbanderu moratiyo, vevari na motiivii vetatu novahongore vomawongero no ma ṱunino wombuze mOtjimbanderu vevari moratiyo na vevatu motiivii; novatoroke vombuze yoratiyo mOtjimbanderu vevari na hambombari ovatoroke vombuze yotiivii mOtjimbanderu. 

Omueze mbwa zuko, Seninarindi, Ovambanderu mouparanga wa Tjauana vari nombongarero onene mOnduezuondjeo, Ghanzi. Rimwe romapu omanene ndari ombazu pu neraka rawo. Kakutja nai ozondekurona nḓe hungira nokuzuva omaraka ayeevari inga za kuramene okurya omatama yevari rOtjimbanderu nOtjiherero?