Ozongungu zovakuru nḓe rira, ena rembo romaserekarerwa ndi mari tara kovita vyOvambanderu nOvaherero nEhi rOvandoitji moruveze rohuurire yehi ndo, ovaṱi novakuru tji va piruka nganda ai katwara kOtjiṱiro Otjindjandja tjomihoko mbi. Hapo ongwaye ozongungu nḓa tji ze rira ngamba? Embo ndi mari yanda norutu rwa Mbakondja nda tuwa mekutu okuza nokuyahewa mondota yotjipara i iumwe wovahongore votjimbumba tjovita tjOvandoitji, Von Finkenstein.
Tjinga Mbakondja aari omburuma kOvandoitji nekuya monyama yao ngandu kotjiuru tje tji kwa tuwa otjimariva. Kutja ngwe mu kambura ne mu yandja kovahuure ma sutwa.
Otjiuru tja Mbakondja otjisenina katjipupu. Von Finkenstein tjinga wina ae mu havarisa ozohanga inḓa’ze. Embo ra Katjiikumbua Maharero ri urisiwe kutja: “matu ṱu amatu ru”.
Meṋe yokumukambura tjinga aari ondjahe Von Finkentein pe mu yahera mondota nu aveyevari ave ṱire mbo.
Ngunda Von Finkenstein aa horekwa imbo pa wire nomunavita we omunene Mbakondja, orutu rwe aru tuwa mekutu naru twarewa ku rwa twarewa.
Kutja aru ha kakara nehuno.
Ozongungu zovakuru novaṱi ngamba tji ze hi nehuno nu tji zerira mape ya? Nu hapo wina kamena rotjiṋa tji tji ve hi ya suva kutja omominyo poo omehupo? Na wina mena rokurarakana ehupo tji va yarukasana?
Mokuramanga ehupo nombwiro nandarire kutja mutjo tjini mbe nehupo ovaṱiṱi motjivaro tji ve riko.
Wina hapo kamena rokuhiyaverurwa? Tjinga ovirwaro mouinyo worutanga rumwe tji vya haverurirwe, rumatisa rarwe mominyo vi vi rumata.
Omayuva nga epu rimwe rovihungiriro ongondoroka nOtjiṱiro Otjindjandja. Tjimuna Oritjaine nda zuko pOnganda yOmahongero wOkombanda movirihongwa vyOunongo wakandino indji, Onusta.
Omuhungire umwe putjo ndjari ondekurona Joyce Muzengua. Ousupi noupapi watjo tjari kutja pe nohepero yokuteza nokunongonona ozondekurona mominyo na mourekoto wazo.
Tjinga pendje na momauzeu wehupo nombameno yaro, ominyo mena rOtjiṱiro Otjindjandja aze hi ya verurwa.
Pa tambuka ombata mokati na pokati kozondekurona mOtjauana na Namibia ohunga neraka kutja ndi mari sokuhongwa kOtjauana Otjiherero/Otjimbanderu. Tjimuna ozombata zarwe ozengi mokati koviwaṋa vyOvaherero nOvambanderu, notuhaho, tji mape ya arire mena rokuhiyaveruka mominyo komihoko noviwaṋa mbi.