OKANGHUDI – Omupresidente omukulu gwaNamibia Hifikepunye Pohamba okwa kumagindha ngoloneya gwaHangwena Kadiva Hamutumwa opo a konge omahala giikunino osho wo omapya gokunduluka iikulya moshitopolwa.

“Ondi shi shi kutya itatu vulu okweeta po iikulya ayihe, ihe natu ete po mbyoka tatu vulu okweeta po, opo kaatu kale tatu indile kehe shimwe,” Pohamba ta popi ngaaka.

Ta ti, Ohangwena nayo nayi kale wo yi na ehala lyokueta po iikulya ngaashi kiitopolwa yilwe, ta gandja oshiholelwa shaMusati nOshikoto.

Ta gwedha po ta ti, uunamapya owo ehukamugongo lyoshilongo, mboka tau vulu okutaandeleka eliko lyoshimaliwa moshilongo noku kandula po ondjala noluhepo. 

“Itatu vulu okupopya ekandulepo lyondjala, inaatu tumbula nkene tu na okulonga opo ku kandulwe po uupyakadhi mboka hawu eta ondjala, oshoka ohawu kandulwa po uuna wa tulwa miilonga, 

Otwa pumbwa okukala tatu dhiladhila tatu endelele, okuyapo noompito osho wo oondunge ndhoka tadhi tu tungu okuhuma komeho, osho wo opo tu vule okukandula po ondjala moshilongo,’’ Pohamaba ta kumagindha ngaaka. 

Ta gwedha po kutya uunamapya ohawu pula oondunge, omadhiladhilo, oonkondo osho wo eyitulemo.

Omupresidente gwoshilongo Netumbo Nandi-Ndaitwah naye okwa kala nokuhwahwameka uunamapya moshilongo. 

Ta popi kutya okwa ndhindhilike aanyasha oyendji taya kutha ombinga moshimpungu shuunamapya shoka tashi hokitha notashi ulike euveko lyaanyasha mpoka lyi thike nena.

“Ohandi kala ndi uvite ohokwe sho aanyasha taya kutha ombinga miimpungu yuunamapya oshoka nale oshimpungu shuunamapya osha li sha talika ko shaantu mboka kaaya uvite ko,” ta tanga ngaaka. 

Nandi-Ndaitwah ta ti oshimpungu shoka okwa li sha talika ko shoongaga, ihe osho shi na oshilonga shi vulithe iimpungulonga oyindji. 

Ta gwedha po ta ti, ngele oshilongo tashi longo neitulemo osho wo nuudhiginini, monakuyiwa otashi ka landitha wo iikulya kiilongo yokondje, nopamukalo ngoka eliko moshilongo otali indjipala. 

“Otu na omahala ogendji nagamwe opo taga tungwa, taga monika nawa pakutala ihe itaga landitha iikulya tayi ndulukwa moshilongo, shoka hasho ehumokomeho,’’ ta nyenyeta ngaaka. 

Ta gwedha po ta ti, ehumokomeho ongele iikulya tayi longwa moshilongo.

Nandi-Ndaitwah okwa popi ta ti oshilongo shoka itaashi vulu okwiipalutha shoshene, nena itashi vulu okwiithikamena po kusho shene. 

“Onkene oshilongo oshi na okulonga nuudhiginini, opo kaashi ka indile puushiinda. Otandi kumagidha aanafaalama ya longe nuudhiginini okuyambula po eliko lyoshilongo oshowo oku kandula po ondjala moshilongo, 

Omupresidente ta kumagidha kutya aanyasha itaya vulu okukala yaa na iilonga, omanga ye na ompito yokwiilongela yo yene. 

Ngoloneya gwaHangwena Hamutumwa okwa ti shoka a pulwa komupresidente omukulu oku na oku shi gwanitha po, nonando ya tameke nale nooproyeka dhimwe moshitopolwa.

“Nonando omahala gamwe kaage na omavi g eli nawa nokukunwa, otaya kambadhala ashihe taya vulu opo oshitopolwa shi kale tashi nduluka iikulya,” ta kwashilipaleke ngaaka. 

Ombaanga yoAgribank nayo oya pitithile omushangwa kutya ohayi yambidhidha aanafaalama nomikuli, noya li ya hiya oshigwana shi ninge omayindilo osho wo ya konge uuyelele nkene ye na okuyambidhidhwa. 

Omunafaalama gwiikwamboga Soini Ndikwetepo ngoka e na oshikunino shi li kOnampira moshitopolwa shaShana okwa ti,ongeshefa ye otayi ende yu uka pevi oshoka kape na omayambidhidho ga gwedhwa po uuna sho ta nyengwa.

“Onda kondjitha ethimbo okukonga omayambidhidho okuza mpeya naampeyaka ihe inandi mona eyambidhidho, oombaanga nuuministeli otau pula iinima kaatu yi na,’’ ta nyenyeta ngaaka. 

Ta gwedha po kutya ngeno okwa li epangelo tali yambidhidha aanafaalama unene yiikwamboga ngeno eliko lyoshilongo olindji itali piti mo.  -vkaapanda@nepc.com.na