Ananias Paulus a shivika nawa Kastyle Ndonga Boy okwa ti okwa tameka momudo 2021 okushika eengalo nelalakano lokuhafifa ovanyasha vakwao.

Okwa ti naye okwa nukila mo mondabo nokushika eengalo doKwaito odo di holike unene kovanyasha.

Omunyasha ou a dalelwa komukunda Oshigambo koshitukulwa shaShikoto okwa ti oha kala e udite ombili ngeenge e li komesho yovanhu ta shiki eengalo.

“Ohandi xupu ashike meengalo dange okulimonena mo okamaliwa shaashi kandi na oilonga,” ta ti.

Okwa hokolola ta ti okudja ashike kounona okwa li e hole okupwilikina eengalo doKwaito naashi osha eta opo a longife ounongo waye okwiimba.

Okwa ti okwa shika ongalo yedina “ etumwalaka la dja komulumenhu a dinika”, sha hala okutya nande kala wa dinika kovanhu ino pumbwa okukala okuteka omukumo moilonga yoye.

Paulus okwa ti oha shiki eengalo keenhele da yooloka ngaashi keefikola, keehango osho yo keendingosho.

“Ohandi fiki ponhele keshe opo dai fanwa. Elalakano okumwenyeka oshiwana tashi pitile mokulongifa ounongo wange,” ta ti. Okwa ti okwa xwaxwamekwa komushikingalo ngaashi Young T wokOngha eshi alushe a kala nokupwilikina eengalo daye ndele te li hongele ko. “Onda kala alushe ndi hole okupwilikina eengalo davo fiyo naame nda kufa ko oshihopaenenwa shiwa osho va ulikila nge,” Osho a yelifa.

Okwa kumaida ovanyasha ve li momaumbo opo va longife ounongo wavo shaashi osha fimana.

Paulus okwa ti taalela omashongo oshimaliwa ngeenge ta ka shika eengalo keenhele dokokule ashike okwa ti eshi itashi mu teya omukumo.

Okwa pula epangelo opo li kale tali yambidida ovanyasha ovo ve na ounongo wokushika eengalo molwaashi eshi otashi va kwafele okutwikila neengalo davo.

-fhamalwa@nepc.com.na