Omulumenhu weedula 25 omukwashiwana waAngola, okwa li mombete youyehame, vati okwa tuwa nombele nokunyekwa obiila poundingosho.
Oshiningwanima eshi osha ningwa poukamba haku tiwa Omukekete ve li momukunda Etope moshitukulwa shaHangwena oshivike sha dja ko.
Opolifi moshitukulwa shaHangwena oya hokolola tai ti omufekelwa oye a shinda nakuninga oshihakanwa eshi a tameka tete te mu ula kuta Omuangola, yee ke na sha noufemba wokukala moNamibia.
Opolifi oya hokolola tai ti okudja opo omufekelwa okwa nyeka ko obiila ya nakuninga oshihakanwa ndele tei tileshi nokonima okwa kufa ombele yokapi noku mu twa pombada yeisho opo a tuwa nombele. Nakuninga oshihakanwa okwa twalwa koshipangelo shaNgela opo ka mone epango lopaunamiti ashike paife okwa lekelwa mo noku li a shuna koshilongo shavo
Va ti omufekelwa ina kwatwa po shaashi ka pe na oshibofa sha patululwa no nande nakuninga oshihakanwa a mona oshiponga.
Opolifi oya hokolola tai ti nakuninga oshihakanwa omukwashiwana waAngola oo e li omunailonga womeumbo momukunda Etope.
Mwene weumbo omu kwa li ha mu di nakuninga oshihakanwa okwa lombwela Kundana ta ti nakuninga oshihakanwa ina patulula oshibofa shaashi oku udite kutya ke na oufemba woku shi ninga molwashi keli moshilongo shavo.
“Okwa ti ota shuna koshilongo shavo opo a ka dengwe komhepo ipe shaashi ke na vali ombili yokomwenyo eshi a longelwa omunyonena,” ta ti.
Ovanhu pomudingosho pOmukekete otava nyenyeta tava ti ovalulilwa kounona vaumati hava kala tava tu ku ovakulunhu peendingosho, vo tave li denge nokuli monifa oiponga.
Omunashipundi welelo laUkwanyama Eliase Waandja okwa ti ombelewa yelelo itai ka fiya enyama la londa ku li kwao kombinga yeendingosho tadi longelwa oimbuluma.
“Ovene vomikunda nava kale alushe tava lopotele eembelewa doikandjo yavo kombinga yeendingosho tadi longelwa oimbuluma opo elelo li kale la katukila onghatu eendingosho odo,” Waandja ta ti.
Waandja okwa kumaida ovadali opo va kale tava popi nomaludalo avo momaumbo opo hava longe vali oimbuluma.
“Ovadali vamwe ova te kula ounona vavo ondebula shaashi ihava popi nounona vavo ngeenge tava ningi omapuko. Onghee osha fimana opo omudali a kale ta vele okaana kaye ombedi,” ta ti.