Aafuth ye li yatano oya mangwa kopolisi moshitopolwa shaShikoto, ya adhika nokapandi kiimaliwa ayihe mbyoka anuwa ya yugu mofaalama yimwe yi li moshitopolwa shaTsumeb.
Mbaka anuwa oya ponekele ofaalama yiihulunde niikwamboga yedhina Namfo, yi li ookilometa ntano oku za moTsumeb nokuyeka aantu oshimaliwa shi vulithe poN$75,000.
Sha ikolelela kepeko lyopolisi, oshiningwanima shoka osha holoka potundi 12h00 yomutenya, mEtiyali. Otaku hokololwa kutya aalumentu mboka okwa li ya mangelwa mondjila yaTsintsabis oku za kofaalama hoka, sho ya li ya tentenwa kopolisi. Anuwa, aafuthi mboka okwa li ya adhika niimaliwa ayihe ya li ya yugu yoN$75 109 oshowo ongodhi yopeke mohauto ya wo yoToyota Corolla ontokele yonomola N 17296 ND.
Omuniilonga ngoka anuwa a li a ponokelwa kaafuthi okwa li a lopota oshiningwanima shika kopolisi meendelelo.
“Aafuthi mboka okwa li ya longitha ondjembo okumbandaneka omuniilonga ngoka oku mu kutha iimaliwa nongodhi. Ondjembo ya longitha, oya kugunyunwa oonomola dho udhidhilika ondjembo ndjoka,” opolisi ya popi ngaaka.
Opolisi oya ti, aakonakoni yoshipotha oye li metifa, okukonga omulumentu a li pamwe naya kwawo yatano, ngoka ali a mono ompito yoku matuka po, nota fekelwa eli momudhingoloko gwaGrootfontein.
Natango opolisi otayi indile oshigwana shilopete iiningwanima yatya ngaaka, aluhe mbala kopolisi, opo yi vule okumanga aafuthi omanga inaaya matukapo po.
Shika osha holoka ashike esiku limwe sho aafuthi ya yi ontuku niimaliwa yithike N$600 000 Omaandaha, sho ya li ya ponokele omukuluntu gwoNampost mOndangwa.