ǁAupexan ge 20 khoena ǀhubuǀhubusenxūn ǀkha ai!â gere ǂoa wekhe !khōsis !nâ ge ūhe

Selma Ikelas tsî 
      Eveline De Klerks

ǀAEǁGAMS - ǀHaob ain ge 19 ǂâisāhe rana ai!â gere ǂoa sâǁaeb ai !khōsis !nâ !hūb a ǂhabase ge ūhe !kharaga ǀhubuǀhubusenxūn ǀkha !gaeǁaresa ūhâse. Namibiab ǀawa!namn ge nē ǂâisāheran !oagu 12 ǁhōna ge ǁkhowa-am. 

Marisi ǁkhāsib nē ǀhubuǀhubusenxūn dib ge ǀhaob ai N$97 360. Nē ge !khōsis !nâ a ūhen ǁaegub ge 23 kurixa ǀkhuwi-aoto !nari-aob hîa ge N$74 800 ǁkhāsiba ūhâ xana-i ǀkha Donertaxtsēs ai a !khōheb tsîna hâ. ǂOago wekheb di ǀawa!nam !nurib !nâ i g era mîhe, nē ǀkhuw-auto !nari-aob ge 3 740 xramgu xana-i ǀkha ǀAeǁgams tsî Kaiǁkhaes hâra daob ǁkhaes tawa a !khōhesa. 

ǀAwa!namn ge ǀAnes !nâs tsîna khoese khoena xana-i, tsautsausa kokain-i tsî mandrax peldi ǀkha ge !khō. ǁÎn ge !kharaga !khaigu ai ge !khōhe tsî ǀgam 23 kurixa tarekhoera tsî hû aorekhoegu 23 kurin tsî 37 ǁaegu hâgu tsîna. Nē ǀhubuǀhubusenxūn ge N$4 120 ǁkhāsib ai ra ǀnōǀnōhe. ǂNūǂgoaes !nân ge !nona ǂâisāherana N$9 000 ǁkhāsiba ūhâ ǀhubuǀhubusenxūn ǀkha ge !khōhe. Nampas ra mîsa !oan ge nē !nonana ǂoago wekheb Mantaxtsēs ai ǁNâu!gâ!khaib ai!â ge ǂhai xawe ǂnûiǁkhaemaris ai ǂoasa ge ǂharahe. ǁÎn ge 53 kurixa Andrew Bloedooghti, 56 kurixa Katrina Bloedooghts tsî 30 kurixa Eben Pienaar hâna. ǁKhā sâǁaeb di Satertaxtsēs aib ge 28 kurixa khoeba 19 !khaeǀkhārodi xana-i hîa N$190 ǁkhāsiba ūhâ i ǀkha ge !khōhe. ǁKhātis ge 60 kurixa ǁgûsa Erongo ǀkharib !nâ ge ǀhubuǀhubusenxūn ǀkha !khōsis !nâ ūhen ǁaegu ge hâ i. 

ǀAwa!namn ge nē kairas, Monica Mokhatus xōǀkhā noxopa !nona khoena !Gomenǁgams tsî Tsoaxubams hâ ge !khō. Nē ǁgûs ge !Gomenǁgams di Theo Ben Gurirab !Ganni !nâ ǀgam mandrax pelra tsî koro xramgu xana-i hîa N$300 ǁkhāsiba ūhân ǀkha ge !khōhe tsî ǀnai !Gomenǁgams ǁNâu!gâ!khaib ai!â ge ǂhai. 26 Kurixa Johannes Tomasi ge Tsoaxubams !nâ 88 tsautsausa kokain-i ǁgarudi, N$8 950 ǁkhāsiba ūhâdi ǀkha ge !khōhe. ǀUnis ai !khōhe kha ge 33 kurixa Douglas Tsuseb tsî Markus !Owoseb hâkha, 17 !khaeǀkhādi xana-i tsî 15 mandraxdi tsîn ǀkha.