• December 2nd, 2020

Babasiezi mwamuzeko wa bukwenuheli babata tukululo


WINDOKO – Basupile babasa siezi, babanyaziwa kabukwenuheli mwa muzeko omutelele mwanaha Namibia haisamba, base bakupa khuta kuli iba liulule kwa likakalezo kaufela. Progress Samulandela walilimo ze 52, Manuel Makendano walilimo ze 66, Alex Mushakwa walilimo ze55, Diamond Salufu walilimo ze 58, Hoster Ntombo walilimo ze 55, Frederick Ntambila walilimo ze 54, ni John Tembwe walilimo ze 51, basiala mwasitokisi kasamulaho khuta yetuna kasilimo sa 2013 nelaezi kuli muzeko wabona ukale sinca fapila muatuli yomunca, kasamulaho akukona kulwanisa mulatu one bafumanwi.

Bayemeli ba baana basupile, IIse Aggenbach ni Jorge Neves, nebabulezi viki yefelile fapila muatuli swalelele mwakhuta yepahami Petrus Unengu, kuli bao bayemela bana ni kulukululwa kakuli bazekisi bamuuso bapalezwi kubafumana mulatu. Aggenbach kasibili nabulezi kuli ba yemela nesi bayahi banaha Namibia, kakuli nebafumani feela mapampili asipepo kasmulaho akutamiwa ni kulengwa mwa sitokisi. Kacwalo nesi bayahi banaha mi habakoni kuzekisezwa mulatu waku kwenuhela naha ni bayahi bayona. Babanyazwa nebakile bafumanwa mulatu lapilli ni kulengwa mwasitokisi kalilimo zemwahala 30 kuisa mwa 32 ki muatuli John Manyara kasilimo sa 2007.  Katulo yeo ne beezwi kwatuko ki khuta yetuna, kasamulaho sikwata sikupa kuzeka sinca. Babanyazwa nebakile batamiwa mwahala Sikulu 2002 ni Ñulule 2003, mi se bainzi mwasitokisi kalilimo ze lishumi kaze lobapeli. Banyaziwa kakuba ni kabelo mwakubata kutula mubuso wanaha Namibia, mwasikiliti sene si zibahala sapili ka Caprivi, mwahala Muimunene 1998 ni Ñulule 2003. Mulelo wabona wakuli sikiliti sa Zambezi nesi siemba sa naha Namibia, no beezwi kwatuko mwa khuta yepahami. Batalimani ni milatu ya bukwenuheli, bubulai, kubata kubulaya, kubata kupuma sikiliti, bubangoki mwa sicaba, ni kukenya litobolo mwanaha isi kamulao.

Sapile nebanyaziwa kamilatu ye 278 kungelela cwalo ni bukwenuheli, yelobañwi ya bubulai ni ye 240 yakubata kubulaya. Milatu yeo izwelela kwamulelo one upalile wakubata kukeyula sikiliti sa Caprivi kwanaha Namibia. Batu balobapeli nebashwile kasamulaho atwaniso ya bakwenuheli fahalimu aliofesi za muuso la 2 Muyana 1999 mwa Katima Mulilo. Siteshini sa mapokola mwa tolopo, kambe ya masole, miseto ni ofesi ya NBC ne taselizwe, mi bazekisi ba muuso balumela kuli mulelo neli wakubata kusebelisa lindwa. Muzeko uzwelapili mi babanyazwa basiala mwa sitokisi sa Windoko, kwalineku la baba libelezi kuzekiswa.


Roland Routh
2020-11-09 07:38:50 | 23 days ago

Be the first to post a comment...

You might also like...