Bafundoti bamiselo babilaela kwa muuso

KATIMA MULILO – Bafundoti bamiselo mwasikiliti sa Zambezi, babato fitisa lipilaelo zabona kwamuuso kuli utalime sililo sabona, kasamulaho liluko la njimo neli kwalile kuzwiswa kwa mango mwasikiliti sa Zambezi kuisa kwalibaka zeñwi zanaha ñohola. Liñolo la lipilaelo linze lilukiswa kuli litambekwe kumubusisi wasikiliti sa Zambezi. Ñohola, liluko la njimo neli kwalilwe tekisano yamango kuzwela mwasikiliti kasabo yakuli ikaswana yatisa kuzuha kwatukokwani twamiselo. “Liluko neli lemuhile kuli kuna nibafundoti, babanze baleka mango mwanaha Zambia, kakusebelisa museto wa Wenela kutisa mwanaha Namibia. Kalulo yeo ikona kutisa Tukokwani twa Miselo mwanaha, mi ikaswana yatisa sinyehelo hala tekisano yamiselo yelimwa mwanaha.

 Namibia ina nilibaka zesina tukokwani twamiselo zelukela kubukelezwa,” nekubaleha liñolo la liluko. “Liluko mwakubata kufumana tatululo nikufukuza kuambalakana kwatukokwani twamiselo, batu bakatokwiwa kuli bafumane mapampili abalumelela kuleka mango kwanda ‘naha, kwamutayi obona zamakete, ili yeka ciwa feela mwasikiliti. Mango yelekilwe kwanda ‘naha iswanela kuzamaya niliñolo latekisano haifita famuseto, nikwalibaka zasilelezo mwasikiliti.” Zeo halili cwalo bafundoti bamango bana ni maikuto akuli hakuna bupaki bobubonisa kuli kuna nikuzuha kwakakokwani kamiselo mwasikiliti, mi babulela kuli muuso ubata feela kufofaza lipisinisi zasicaba, nikuhulisa pisinisi yanaha South Africa. 

Sikwata kanako yacwale sibato tahisa liñolo lalinonge kwamuuso kaofesi yamubusisi Lawrence Sampofu. Liñolo la linonge viki yefelile Labulalu nese linyatezwi kibatu babalikana myanda yemine. “Hakuna kuzuha kwakakokwani kamiselo kokubihilwe mwasikiliti sa Zambezi, kacwalo miselo yamango kuzwelela mwasikiliti haina tukokwani ni matuku. Bayahi kuzwelela mwasikiliti sa Zambezi babata kuikola miselo yabona yamango, yebakutuzi kwalikota zebacezi famandu abona, nikuikabela nibalikani ni mizwale mwanaha kabupala,” kubaleha liñolo la linonge. Kweli yefelile bafundoti babañwi bamango nebakile babuza lyano lelili mwakulumelela mango kuli ikene mwanaha, haiba iswanela feela kuto ciwa mwasikiliti sa Zambezi. 

“Kanti kiñi sikiliti sa Zambezi hasi kungulezwi kwatuko? Kubonahala kuna kuli babata kuhulisa misika yanaha South Africa, kakuli mango yabona ifumaneha mwalintolo kaufela mwanaha Namibia, kono luna luhaniswa kulekisa mango yelu itimezi kwalibaka zeñwi zanaha,” nekubulezi mufundoti yomuñwi wamango Alfred Lutaka. Sibuabui mwaliluko la njimo Jona Musheko nakupile sicaba kuamuhela taelo yeo, mi naize netahisizwe kamaikuto amande. “Hakikuli lubata kuketulula batu babañwi, luezize cwalo kusileleza misika yaluna,” nabulezi.