Balekisi babata kukala tekisano

Marythar Kambinda

WINDOKO – Balekisi ba mwamakululu nebacauzi mwatolopo ya Katima Mulilo viki yefelile, balaela kuli balumelelwe kulekisa libyana zabona mwamakululu. Balekisi ba mwamakululu nebacauzi kuliba kwaofesi ya Katengo ka Sikiliti sa Zambezi, mwaketelelo yakatengo kaka bayemela, mi nebailo tambeka liñolo la linonge kumubusisi wasikiliti Lawrence Sampofu. “Lipisinisi kaufela likwaluzwi kwanda kulekisa mwamakululu, nihaike balekisi ba mwamakululu baitukiselize kulatelela milao yefilwe yamakete mwakulwanisa Covid-19. Kwaswabisa kwabayahi banaha Namibia babaitengile mwalipisinisi zakulekisa mwamakululu kuli bano tamiwa, kulelekiwa mwalibaka zamalekisezo, ni kuba amuha libyana zabona.

Ili kuekeza kwabunjwebwe bwa bona ni kuekeza kwakutokwa misebezi,” balekisi ba mwamakululu nebabulezi mwaliñolo la linonge. “Kulekisa mwamakululu kimusebezi oswana ni yeñwi mwanaha, kacwalo kuna nikulumelelwa ki mulao. Kiñi milonga ni milonganyana haipalelwa kubona kuli kulekisa mwamakululu kuhulisa mayemo asifumu mwanaha? Hakuna naha mwalifasi ye yahile misika kuamuhela balekisi kaufela, kona hakufumaneha balekisi bamwamakululu mwalinaha zezwezipili ni zesa zwelapili. Kuhanela kelekisa mwa makululu ki bubangoki, kacwalo luna ni kukulumelela, kiñi hakuna ni kuhaniswa?” Balekisi ba mwamakululu nebakupile hape muuso kunolofaza milao yateñi, ili kulumelela balekisi bamwamakululu kuzwelapili ni lipisinisi kapilipili.