WINDHOEK – Omukoonakoni gwiimbuluma moshitopolwa shaMusati Omupehakomufala Moses Simaho okwa dhenge omuthindo kutya aakwashigwana yaAngola mboka ngashingeyi taya pewa iilonga yomomagumbo monooli otaya longo iimbuluma e taya fadhuka po.
Simaho ndhika okwe dhi popi sho omulumentu gwepipi lyopokati a mbothagulwa noombele sho ya li taya kondjele ongodhi yopeke ano petameko lyoshiwike shika.
Nakulongelwa omuyonena nokutsuwa nombele okwa tsuwa nombele yokapi moombati dhokolumoho shoka sha etitha nokuli opo a kale a ya mokoma.
Oshiningwanima shika osha holokele pomukunda gwedhina Oshikwawo polukanda ndoka lu li pomukunda gwedhina Iikokola moshikandjohogololo shaTsandi moshitopolwa shaMusati.
Uuyelele mboka wa gandjwa kuSimaho otawu ti kutya konima yoshiningwanima shika opolisi oya li ya kwata ethimbo okudhitika omutamanekwa nguka oshoka aniwa okwa li nale taningi oompangela dhokuya koshilongo shawo.
“Opolisi oye ya niihauto yi li ihetatu ya landula omutamanekwa nguka ya ya pondatu yongula ihe oye mu manga potundi one yokomatango. Ya adha nale uuka koongamba dhoshilongo a wape okutaaguluka a ye moshilongo shawo,” Simaho osho a ti ngaaka.
Okwa tsikileko ta ti ngele a tamanekwa mbaka ya tokola okuya moAngola ohashi kala oshidhigu kopolisi opo ya mangwe. Okwa hokololwa kutya nakulongelwa omuyonena okwa li a ehama noonkondo nokwa li a falwa kokoma koshipangelo shaShakati.
Nakutsuwa nombele oye nee Iitondoka Linus Alugongo Mandoza omvalele yIikokola moshikandjohogololo osho tuu shoka. Omanga omutamekwa oye Antonio Johaness Kaukukusha Nghilifaali Shimati omukalimo gwomomukunda ngoka gwa tumbulwa pombanda.
Nguka ota holoka mompangu yaMangestrata mOkahao mEtine lyoshiwike shika, naSimaho okwa ti ita vulu okupewa ombooloha oshoka oku na ompito yokumatuka po.