Ovanailonga voundjolowele koshipangelo shepangelo shaMuthiya otava ti ova lulilwa konghalo yoshipangelo shomilaulu, sho vali kashi na omeva okudja omudo wa dja ko.

Ova ti eelamba odo di li moshipangelo ihadi longo vali onghee ohava minikilifa ashike noutoshe veengodi dopeke ngeenge tava yakula ovanaudu oufiku.

Omupangi umwe okwa hokolola ta ti keesaala adishe domoshipangelo ohaku kala kwa laula kaku na olusheno, shaashi vati olusheno moshipangelo omo ihali longo noubalba hava monika meefitola domoshilongo. “Ohatu longo noudjuu efimbo loufiku unene tuu ngeenge hatu yakula oomeme ve uya okupulumuna ile ngeenge omunhu a mona oshiponga,” ta ti. Okwa weda po ta ti omafimbo amwe ovanaudu ohave livake mo moshipangelo molwomilaulu.

Neudo koshipangelo Engela shi li moshitukulwa shaHangwena okwa lopotwa nako ku na vati eendokotola hadi minikilifa noutoshe veengodi davo ngeenge tava yakula ovanaudu koshitandelo. Eshongo likwao li li koshipangelo shaMuthiya oupyakadi womeva oo okwa kala a pata oule wefimbo lile. Vati moshipangelo hamu ningi nande oule woivike ivali ile oshivike shimwe muhe na omeva.

Ova lombwela Kundana tava ti ohava ningi eenghendabala dokweetelela omeva tava kufa komaumbo avo opo va dule okulongifa koshipangelo noshoyo okuyandja kovanaudu ve li meembete shaashi ova pumbwa okunwa omiti davo. 

Omunailonga umwe okwa nyenyeta ta ti ova lulilwa kedimba hali di koundjuwo. Omukulunhuwiliki wouhaku moshitukulwa shaShikoto Joshua Nghipangelwa okwa ti ombelewa yaye oya didilika omashongo a taalelwa koshipangelo shaMuthiya unene tuu eshongo leelamba itadi longo.

“Onda pula nale oshimaliwa kombelewa yaminista wouhaku. Onda tuma nale omusholondondo woinima ya pumbiwa koshipangelo shaMuthiya noshoyo komandiki ouhaku a yooloka e li moshitukulwa. Onghee omukundu ou otau ka kala wa kandulwa po diva,” ta ti.

Okwa weda po ta ti omeva koshipangelo okwa kala a pata molwaashi omunino womeva wa dja kOndangwa hau kala tau ende nakashona. “Oupyakadi womeva a pata owa kuma odoolopa aishe yaMuthiya.  Ohandi ka eta po eetenga domeva tadi kala moshipangelo opo di kale tadi longifwa ngeenge omeva a pata,” Nghipangelwa ta ti.

Okwa weda po ta ti ovakulunhu voipangelo nava kale alushe tava lopotele ombelewa yaye pefimbo ngeenge koipangelo ku na omaupyakadi. fhamalwa@nepc.com.na