Festus Hamalwa 

Oministeli yovanyasha nomaudano, oministeli yomayambule po eedoolopa nomikunda netopolo lomadu, noministeli yeeshi needjo domefuta oda talela po oshikandjohoololo shaNgenga omo kwali da shakena naNgoloneya waHangwena Walde Ndevashiya nakansela woshikandjohoololo shaNgenga Mathew Shikongo novanyasha vomoshikandjohololo omo. 

Elalakano loshiongi eshi oku kundafana nokuyandja ouyelele ngheene eeministeli edi dopatatu tadi kakwafa ovanyasha vomoshikandjohoololo shaNgenga.

Elizabeatha Ndivayele omunambelewa andja kouministeli weeshi neendjo domefuta ou kwali ta yandje ouyelele wa fimana nghee ovanyasha ve na oku kala tava kufa ombinga oku kala tava tekula eeshi momikunda davo.

Ndivayele okwa ti ouministeli wavo owe li longekida opo ukale wa kwafela ovanyasha aveshe a va vena ehalo lokutekula eeshi momikunda davo.

“Ohandi kunghulile ovanyasha aveshe opo va ningi omaindilo oku kala va pewa eeshi dokutekula momikunda, shaashi eshi osho omukalo muwa wokukwafela ovanyasha ve te po oilonga yavo nokulonga oshimaliwa shavo ngeenge tava landifa eshi davo edi vatekula,” Ndivayele ta ti.

Ndivayele okwa ti oministeli otai ka yandja omadeulo oshali kovanyasha kombinga yo kutekula eeshi. Yee ta denge omufindo ta ti eeshi onda fimana unene shaashi odina eevitamine doitungifilutu, onghee oshiwana nashi twikile oku kala tashi li eeshi. Omanga kouministeli yomahambule po eedoolopa nomikunda okwa ndja Emilia Mutota ou ali yoo naye ta yandje ouyelele wafimana kombinga nghee ovanyasha vapumbwa oku kala tava ningi omaindilo epoloyeka doku ninga eengeshefa.

Mutota okwa twa ovanyasha omukumo opo va kwatafane nombelewa yavo ili mEenhana ngeenge va hala oku pewa okwafo oku tameka eengeshefa davo. Okwa ti oministeli yavo oha i yandje eepoloyeka dayooloka ngaashi ounafalama weexuxwa, oku ninga oimeno yoikunino, oku ninga eedopi, ounamapya, nosho tuu. 

Onghee ovanyasha otava kunghulilwa opo va kale tava kufa ombinga oku ninga omaindilo. 

Martin Nghiitombo andja kouministeli yovanyasha naye okwa li amona omito yo kuyandja ouyelele kovanyasha nghee oministeli yavo hai yandje omayakulo kovanyasha moshilongo.

Nghitombo okwa popya ta ti oministeli yovanyasha hai tumu ovanyasha opo vaye komandiki opopaungomba vo vashiive ve kelihonge va mono omaunongo moinyangadalwa yayooloka.

Okwa pa ovanyasha ouyelele kombinga ye fimano lomaifano aa elihongelwa komandiki oministeli yovanyasha nomayakulo opo shiwana shi kale shina eshiivo kombinga yomaifano ayooloka. Okwa denga omufindo ta ti omunyasha keshe okwa manguluka oku kala ta ningi omaindilo okuya komandiki.

Ngoloneya waHangwena nakasela woshikandjohoolo shaNgenga ova pandula unene eeministeli edi natu eshi da kufa etokolo lomondila opo  yandje omauyelele afimana kovanyasha.

Ova twa ovanyasha omukumo opo va longife omito ei nokulitula mo moilonga yavo. Ovanyasha navo ova holola olupandu lavo linene kouyelele ou va pewa.