Egumbo lyomunangeshefa a tseyika nawa Frans Aupa Indongo olya pi po thiluthilu komulilo ongula yoMaandaha gwoshiwike shika momudhingoloko gwEvululuko, mOshakati shokuuzilo mOshitopolwa shaShana.
Sha ikolela komupopiliko gwopolisi moshitopolwa shaShana Thomas Aiyambo, oshiningwanima shoka osha holoka okuza pondi 10h00 yongula, nomulilo ngoka okwa li gwa kwata oowili dha pita puntano okudhima thiluthilu.
“Omulilo ngoka kaagu shiwike kutya ogwa etwa koshike, anuwa okwa li gwa tameke Osoondaha moshana shili konima yegumbo. Omulilo ngoka anuwa okwa li gwa dhimwa kukadhimamulilo gwaShakati esiku ndyoka ,”Aiyambo ta ti ngaaka.
Ta hokolola ta ti, omulilo ngoka nani anuwa kakwa li gwa dhimi thiluthilu Osoondaha ndjoka.
Okwa li gwa tsikile okufika omwiidhi ngoka gwa kwatathana nekoye lyomunangefa Indongo, ngoka gwa li gwa yi sigo omegumbo nokufika.
Aiyambo ta ti , megumbo moka omwa li mu na ohango Osoondaha ndjoka omulilo gwa tameke. Omwa li mwa pile iiniima oyindji lela, mwa kwatelwa kehe shimwe sha li sha longithwa moshituthihango Osoondaha ndjoka.
Omulilo ngoka gwa fike anuwa uule wethimbo, okwa li gwa pondolwa kookadhimamulilo ye li yatatu, gwaNgwediva,Oshakati oshowo gwaShikuku opo gu dhime thilu thilu.
Aiyambo ta ti, kapu na nando omuntu a mona oshiponga, nelago enene ootenda ndhoka dha li dha thikama natango inadhi fikwa komulilo.