Aakalimo yomOngwediva oya penduka nonkundana ombwanawa mEtitano lya zi ko sho yali ya pewa oopolota dhoku tunga omagumbo gawo okupitila mehangano Shack Dwellers Federation of Namibia.
Elelo lyondoolopa yaNgwediva olya gandja oopolota 21 kaakalimo mboka yali ya dhiginine nokwiitulamo, okuza moopolota 98 kolukanda lwaSky. Ehangano lyoSDFN ohali kwathele kehe ngoka ena iiyemo iishona noshimaliwa shoku tunga shoka haya shunitha muule wethimbo ele, niimaliwa yontumba.
Iilyo yehangano ndyoka natango ohayi gwongele oshimaliwa shawo, okuya kwathela noku ya yambidhidha okutunga, ngele iimaliwa taya kwathelwa nayo kehangano lyoSDFN inayi gwana. Omupevi minista gwomapendulepo gwoondolopa nuushayi Natalia Goagoses okwati, ka pena nando omuNamibia gumwe ena okumona iihuna. “Okuza moombashu ka kuna uuyogoki, aantu otaya vulu okukwata ko mikithi dha yooloka okuza moombashu. Oyendji haya zi moombashu kayena oopomba dhomeya oshowo omalusheno.
Goagoses okwati, omagumbo ngoka otaga ka tungwa kiilyo yoSDFN nomayambidhidho okuza ko ma hangano Ohorongo Cement, RMB Namibia oshowo Pupkewitz foundation.
Ngoloneya gwoshitopolwa shaShana Elia Irimari okwakumagidha oshigwana shilongithe ompito ndjika okumona omagumbo gawo yene.
“Ehangano ndika otali kwathele okuyambulapo noku humitha komeho oshigwana. Otandi pandula omahangano ngoka taga yambidha natango ehangano gatsikile oshowo oshigwana shi kale tashi landa moongeshefa moka,” a popi ngaaka. Irimari okwagandja oshiholelwa shaakalimo yomondoolopa yaShakati mboka tungu omagumbo gawo okupitila mehangano ndyoka. Maria Kandenge okwa ti, okwali hazi moshipeliki hashilokelwa omvula, no ha shi kala shuudha omavi ngele kuna ombepo, ihe paife oteende ondenga, oshoka okuna egumbo lye eli tungu okupitila mehangano ndika.
Ilyo yehangano ndika oyati, oya lombwelwa yi kale yatameka okutunga omagumbo gawo muule yiiwike itatu komeho. Taya ti, kehe gumwe otaka shunitha oshimaliwa shoka muule woomvula 11 komeho, no taya kala taya futu N$ 360 komwedhi.
Ruth David gumwe go mwaamboka ya mono omahala okwati, enyanyu lye enene noonkondo oshoka ethimbo lyokuza moombashu okuya momakuma lyathikana.
“Onduuvite ombili oshoka otandi mono ehala lyandje mwene. Onda dhidhilike kutya aantu oyendji kaayuviteko uuwanwa wehangano ndika, ihe oyetu kwathela lela,” a popi ngaaka.
Ta ti, kehe ngoka kena ehala lye mwene nenge ta mono iihuna, eli moombashu, ethimbo o paife lyoku konga ehala nomaigumbo gawo gomakuma, okupitila mehangano ndika.