• April 19th, 2019
Login / Register

Katengo kamuuso kalukulula mali alinanga


WINDOKO – Katengo kakamaiso yamuuso nekalukuluzi mali afitelela bolule ba N$572 (N$572.7 million) kuli asebeliswe mwakulwanisa linanga, ni kutusa baba taselizwe kilinanga. Likwambuyu yabona za Mañusa ni Bulyambombola nabulezi zeo kanako yamukopano ni bamakande Labulalu viki yefelile. Naha Namibia itaselizwe kilinanga lelituna mwalilimo zesilezi zefelile, mi likomu zamali abolulelule seli shwile, mi tutengo twabalimi tukupile mueteleli wanaha Hage Geingob, kuzibahaza nako yetata yalinaha kwamafelo akweli ya Lungu. Simataa naize muuso uitukiselize kunyatisisa kana pula ikanela kuzwa cwale kuisa mafelo akweli ya Lungu. Naize katengo kakabona zalinanga, liluko lasilelezo ni liluko la makete kona babakatalima twaniso yalinanga. Naize mali asulilwe, akasebeliswa kwakuleka lico, libeelo zamezi, lico za limunanu, ni kulifela mafulisezo, hamoho cwalo nikucipisa lico zelekiswa zalimunanu. Mi naize taba yeo ika ezahala feela haiba balimi bafukuza likomu zabona kuli yomuñwi ni yomuñwi yataselizwe ki linanga abe feela ni likomu ze 25 ni poho iliñwi, nekubihile Nampa.

ìKaufela bababata kuluwa likomu zeñata habana kuhapelezwa kufukuza palo yabona, kono lubakupa kuli bafukuze, mi hakukaba hande bakona kuba nize ñata hape, katengo kamakande nekabihile Simataa hane abulela. Mwakweli ya Mbuwana kasilimo sa 2015 liluko la njimo kakusebelisana ni ofesi ya Ngambela wanaha, nebakile baba nilipatiso zene bonisize kuli njimo nekutezi fafasi ka 46 pesenti. Patisizo yeo nebonisize kuli naha netalimani nikutokwa kutulo hande lapili mwalilimo zelobapeli. Nekubonisize kuli batu nebatokwa tuso kuisa kwakutulo ya Lungu 2016. Kuekeza fo kufumaneha kwalico ni mezi nekukutezi fafasi mi batu nese bahapelezwa kuca hañwi kazazi.  Piho nebonisize hape kuli naha Namibia haina kufumana pula kanako yakulima ya 2015/2016. Taba ye netisize kuli batu batokwe lico saka ni mezi abatu ni limunanu zabona.


Kuzeeko Tjitemisa
2019-03-25 09:28:29 25 days ago

Be the first to post a comment...