LINYANTI – Muuna walipisinisi mwakezo yabuitati yakukaula mezi, ni kutima sicaba kaufela, inyemisize bayahi baLinyanti mwasikiliti sa Zambezi.
Muuna walipisinisi yazibahala hahulu Walter Mali, yasimuluha kwasilao seo, ukulubelwa kuli nakwalezi mezi kuli asike abubela mwalisa la Sampisi kuzwelela nuka ya Linyanti.
Taba yakukwala mezi ibihiwa kuli neingilwe ki Mali kutibela mezi kuli asike ayofita kwasimu yahae, kwana bata kuyaha mutano oliba mwasimu yahae.
Kono mubakweli kuinduna silao Robert Mwala nanyazize muuna walipisinisi hana bulela ni babihi bamakande, kakubulela kuli nasika lemusa ni kukuteka sicaba ni khuta.
“Nelusika tabiswa kitaba yene ezahezi yakukwala mezi. Khuta ni sicaba nelisika lemuswa. Neluilo bihelwa feela kibalisani kuli lisa likwalilwe,” nekubulezi Mwala. Naekelize kuli lisa nelisika amuhela mezi mwalilimo zelishumi kazesilezi, kacwalo sicaba nesihauhezwi kufumana mezi. “Kacwalo taba yakukwala mezi nesa tabisi.
“Taba ye haitabisi. Kakuli selungile lilimo zeñatañata inge lusaboni mezi, ni limunanu zaluna inge hamulibona kwani zanyanda, ni batu kaufela banyanda. Hape nuka ye hakiyaluna lunosi kiya lifasi,”nekubulezi Mwala.
Nduna yomuñwi Muyaukwa Sipula nabulezi manzwi aswana. “Mezi amuunda atile kanako yeswanela. Bana baLinyanti ni bana basikiliti se, nibona kuli bamwa mbombolelwa yetuna hahulu, kakuli mezi kikale atofita fakaufi ni bona, mi akatusa ni limunanu zaluna,” nekubulezi Sipula. Naekelize hape kuli khuta nelikile kubiza muuna walipisinisi kono nekusika fumaneha tatululo. Hana lizelizwe kuli aikalabele falikakalezo zeo, Mali yana utwahala kuhalifa nahanile kubulela. “Zamaya uyo buza mutu yana kufile litaba zeo, isiñi na,” nabulezi kabukuswani pili asika puma muhala.
Muzamaisi wa kampani ya Halutusane ili yene ilo tibela mezi, nazibahalizwe kuba Julian Masule.
Kono naicanganisize halizezwa, mi naize mwendi nalyanganisizwe ni mutu yomuñwi. “Hanizibi zobulela; mwendi unilyanganisize ni mutu usili. Na haniyo mwa Katima Mulilo, nibelekela mwa Swakopmund,” nabulezi. Kububa kwamezi kuse kukutiselizwe, kasamulaho sicaba nesi ilo tibulula kone kutibilwe.