KATIMA MULILO – Bayahi basilalanda sa Kabbe babazielehanga linako zalitabula kwaminzi yefumaneha kwamukululela wa Zambezi, bakazwelapili kuzieleha hala linzila kakuli milelo yakuzusulusa nzila yanuka yese ingile lilimo isa sebezi isiyala mwasimbwi. Taba yeo itaha kasamulaho mulelo wakatengo kasikiliti wakuzusulusa mukolo wa Kapelwa Kabajani, ofumana libizo kuyo nali ndwalume wanaha, Richard Kapelwa Kabajani ubonahala kufofala. Lonji ye ne lekilwe mwanaha Botswana kamasheleñi amañatañata neli kuli uto tusa bayahi basilalanda sa Kabbe ya Mutulo niya Mbowela, kono ufetuhile matota kakuli ungile nako yetelele ufwekile falikamba kufita kulonga batu. 

Taba yeo neli cwalo kakuli bazamaisi nebahohisana kuli bakana balifisa batu bukai hala mukolo okona kulonga nilimotikala. Mubulelelo omuñwi neli wakuli nuka ya Lyambai ina nikuyepiwa, mi mubulelelo wo seungile lilimo zene. 

Mwakweli ya Yowa, muyemeli wasilalanda sa Kabbe ya Mutulo John Likando, nakile abulelela mubihi yoo kuli mukolo uka kala kusebeza, kakulonga batu ni libyana kuliba Kasika, Impalila, Muzii, Nankuntwe, Namiyundu, Luhonono, ni Imukusi mane kutofita mwa Katima Mulilo, kono manzwi awo afetuhile sepiso yeñwi yasipolitiki yekafilikanya bayahi basilalanda sa Kabbe. Likando nakile atalusa kuli, mukolo nolukisizwe mi notatubilwe.

Kono kasamulaho alikweli zene, mukolo hausikakala kale kusebeza. Hana kupilwe kufa liseli hala kalulo yeo, Likando napalezwi kunitifaza kuli mukolo ukakala kumata lili. “Mayemo amezi mwanuka akutezi hahulu fafasi, kakuli nekusina muunda omuñata silimo se, kacwalo mukolo haukoni kusebeza kakuli mokuñwi kuomile mi mezi kiamakuswani,” nabulezi. Hana buzizwe hala milelo yakuyepa nuka ya Lyambai, Likando atokwa puo mi abato patulula kuli hala zeñwi lingambolo ninaha Zambia zakuyepa nuka kakuli mokuñwi mokuswanelwa kuyepwa kufumaneha kwalineku la Zambia, nelisika zamaya hande.