KATIMA MULILO – Liofesi zalilalanda za Kabbe ya Mbowela ni Linyanti, nelikwaluzwi simubuso ki Likwambuyu wa Zwelopili ya Libaka Zalitolopo ni Matakanyani Dr Peya Mushelenga, Labune ni Labutanu kakutatamana cwalo. Mwalinako zakwamulaho sikiliti sa Zambezi nesi aluhanyizwe mwalilalanda zesilezi zalipolitiki, kono kasamulaho wakutama sinca miseto yalilalanda ni likiliti kasilimo sa 2013, nombolo yalilalanda yato ekezwa mwasikiliti sa Zambezi kuzwa mwabusilela kutaha mwabulobañwi, mi lilalanda za Kabbe ni Linyanti zato abwa fahali. Kuzwelela nako yeo kutaha cwale lilalanda zepeli nelisebeza lisina miyaho yeinelezi, kono kuzwa cwale zeo sekaba matangu kasamulaho wakukwalulwa kwaliofesi zepeli.
Hana bulela kanako yakukwalula miyaho viki yefelile Dr Mushelenga natalusize kuli liofesi liyahezwi sicaba mi minyako yateñi iswanela kukwalulelwa sicaba nako kaufela. “Kacwalo ofesi ye, muyemeli wayona nibabeleki baswanela kufumanwa kisicaba nako kaufela. Kalulo yeo ika konisa kuli lipilaelo zasibaca litalimwe kabunako. Kalulo yeo ikahulisa maikuto asicaba akuli miyaho iluilwe kibona mi bakaikola kuambola mwalitaba zasicaba nikukandeka hala litaba zetisa zwelopili,” nekubulezi Mushelenga. Likwambuyu hape nangile nako kuitumela kwabayahi baliofesi hamoho cwalo nikatengo kasikiliti mwakubona kuli kaisa lisebelezo zamuuso mabapa nisicaba. Nakupile hape bayahi balilalanda zepeli kubabalela liofesi. Liofesi zepeli neliyahilwe kamasheleñi alikana bolule balishumi kabasilezi yeñwi ni yeñwi.