Ndu ya Milao Labune netalimani ni misunga mwahala babeleki basilelezo, ni limembala zandu ya milao kuzwelela kwa kopano ya LPM, ili taba yesika bonwa kale mwandu ya milao.
Babeleki basilelezo nebakeni mwanjao kasamulaho Mubuleli Peter Katjavivi naba laezi kuli balundule likangati muzamaisi wa LPM Bernadus Swartbooi, nakonyana Mueteleli wanaha Hage Geingob amano fitisa manzwi ahae amayemo anaha, mi napatehile kualaba lipuzo kuzwelela kwalikopano zwelwanisana.
Hana sindeketwa kuzwa mwandu, Swartbooi nawisize mulamu wa mwandu yamilao fo uinanga, ili taba yene ekelize kwalilata mwandu ya milao.
Neli kayona nako yeo mubakweli wahae, Henny Seibeb, napazauzi bukanyana ya Mulelo wakutisa zwelopili ya Harambe fapila Mueteleli wanaha. Seibeb nakashizwe, kusotezwa ni kulambelwa kumuzwisa mwandu ya milao, ili taba yene hapelelize Katjavivi kuyemisa mukopano.
Mueteleli wa RDP Mike Kavekotora naize misunga yene ezahalile haibonisi hande.
“Sapili mubuleli napalezwi kuzamaisa ndu kufitela lika lifosahala. Naezize taba yeswanela kakukupa limembala zepeli kuli bazwe mwandu,” nekubulezi Kavekotora. Kono naekelize kuli mulelo hana bizize babeleki basilelezo kuto zwisa limembala zepeli “neli taba yabukuba niyene sa swaneli.”
“Hape naezize taba yeñwi yabukuba yakuyemisa mukopano kutima luna babañwi kolo yakubuza Mueteleli wanaha lipuzo. Cwale bababeli neba zwiselizweñi haiba nesi kukutisa likute mwandu,” naekelize.
Muyemeli wa kopano ya Nudo Josef Kauandenge naize zene ezahezi mwandu ya milao nelisa lukeli kuezahala. Kono nanyazize Katjavivi kakubiza bakanteli bamueteleli wanaha kuto zwisa limembala zepeli.
“Hakubilaezi mikwa ya limembala zepeli, mubuleli hana maata akubiza batu babasika lumelelwa kukena mwandu ya milao. Nekusupeza kuli bakanteli bamueteleli wanaha nebabile nikabelo mwakulundula limembala zepeli zandu yamilao,” nabulezi.
Mueteleli wakopano ya PDM nabulezi manzwi aswana, mi naize neli taba yefosahezi bakanteli ba Geingob kuzwisa limembala zepeli zandu ya milao.
“Nasa swaneli kukena mwanjao hakikalulo ya babeleki basilelezo, bupilo bwa mueteleli wanaha nebusiyo mwakozi kuli aicumbele mwateni,” nekubulezi Venaani.
Mubakweli kumubuleli wandu ya milao Loide Kasingo naize limembala zepeli seli ezizwe kasishemo hañatañata ni hane lilobaka milao.
Munyatisisi walitaba za lipolitiki Graham Hopwood naize likezahelo neli swabisa kubona, mwandu mokuswanela kuba musumo watukuluho.
“Lyano, kozo ni litoho zehulile zatokwahala kubona kuli kuna ni kutwano hala likopano kaufela. Isamba naha isanzo lukuluha likopano zelwanisana hane likanana, nekusina mipingo yeswanasina ye mwandu ya milao,” nabulezi.