Katima Mulilo – Mubakweli ku Mueteleli wa naha Nangolo Mbumba ukupile tutengo twa muuso ni twa kwamukunda mwa Namibia, kubona kuli hakuna sialuluti habasebeleza sicaba. Mbumba nabulezi manzwi awo kanako yakukwalula muyahoi omunca, wa Katengo Kasikiliti sa Zambezi Labulalu, ili one uyahilwe fasinyehelo yamali afitelela bolule bamwanda ka bamashumi amalalu ka a ketalizo.  Mbumba naize tutengo twa sikiliti ni twa litolopo kona misumo mwakuyaha naha, kakuli tuzamaisa litaba zakubona kuli sicaba siba nikabelo mwamilelo yamuuso. Kacwalo tutengo to, tuswanezi kubona kuli batu kaufela baba nikabelo.

“Sica sa sikiliti sa Zambezi kakuba bayahi banaha Namibia siswanela, sina bayahi banaha kaufela kusaikutwa kusialela mwamulaho, kono baswanezi kuba nikabelo ibe mwa minzi, tolopo, ni mwa lilalanda hamoho cwalo nimwatutengo totushelashelana twakutisa zwelopili hala matata awo batalimani ni ona,” nabulezi. Mbumba nahatelezi kuli taba yaliswanelo zabatu zeswanasina mezi, mubu, likolo, lipatela, mikwakwa, nilitaba zanjimo, liswanela kuabelwa sicaba kakulikanelela kaufela kolitokwahala.”

Muyaho walikalulo zene kuya mwahalimu, noyahilwe mwalilimo zeketalizoho kasinyehelo yamali afitelela bolule ba mwanda ni mashumi amalalu ka aketalizoho, mi kwanda aliofesi, muyaho una ni sibaka sa lico, sibaka samatifazo ya mibili, simelela sesikenisa mezi, mi hape sibunolo kwabatu babana ni buanga. Mbumba naize mayemo nibutokwa bwa muyaho busike bwa bonwa feela mwa bunde bwa muyaho, kono bubonahale mwamibelekelo sakata mwa sikiliti. “Batu ba Zambezi bakaikutwa feela hande, haiba minyako yamiyaho inge iba yekwaluhile nako kaufela, haiba inge mufumaneha kwa liofesi kalihola zamisebezi, nikuli musike mwaketulula batu bakeñisa mushobo kapa mubala, nekubulezi Mbumba. Hana bulela kanako yeswana muinasipula wakatengo kasikiliti, Beaven Munali, naize linako zeñwi nekuli tata kusebeza bakeñisa kutokwa hande liofesi, kono cwale zeo likalibalwa. Nilumela kuli babeleki bakasusuezwa kusebeza katata. Haki kuina feela mwaofesi yende, kono kitaba yakubona kuli mueza musebezi one mufilwe. Muhupule kuli ofesi yeo hakiyamina, kono kiofesi yasicaba mi musike mwailuwa nikutuhela misebezi yamina,” neku elelize Munali.