RUNDU – Meatco izibahalize kuli ika kwalula libulaelo la likomu la Katima Mulilo, nikulizamaisa mwalilimo liketalizoho, mwakutusa kampani ya Zamco,  ili yene palezwi kukwalula libulaelo. 
Pulao yamakalo itekezwi kuezahala Labulalu. Muzamaisi yomuhulu mwaliluko la njimo, Percy Misika nanitifalize taba yeo. 

“Muuso nofile Zamco maata akuzamaisa ndu ya pulao, kasamulaho akukwalwa kwa Meatco mwasikiliti sa Zambezi lilimo zene zefelile. Kono libulaelo halisika kwalulwa kale kutisa cwale, kakuli kampani ya Zamco nepalelwa kulizusulusa,” nabulezi. Kwamakalo akweli yefelile balimi mwasikiliti sa Zambezi nebabilaezi hala kutokwa musika wa kulekisa likomu zabona.

Mwaku alabela kwalipilaelo zabona, Misika naize Zamco ikeni mwatumelelano ni Meatco, kuli ibatuse kuzamaisa libulaelo mwalilimo liketalizoho. 

Kalulo yeo ika konisa Zamco kuli ihule mwakamaiso, kuli kasamulaho alilimo liketalizoho ikone kuikemela nikukona kumaisa lika. Misika nabulezi hape kuli muuso uka felisa tumelelano, haiba Zamco inge ipalelwa kubonisa kuli itukiselize kuamaisa lika, mi Meatco ika lumelelwa kuzwelapili. 

“Tumelelano hala Zamco ni muuso kuli izamaise libulaelo isa liteñi,” Misika nabulezi. Naekelize kuli libulaelo nelitokwa kulundululwa, ili kalulo yeo muuso nosakoni kueza bakeñisa kutokwa masheleñi.
Mwasilimo sa 2018 liluko la njmo nelikile la tambeka peleko yakulundulula libulaelo, kono peleko nefelisizwe bakeñisa musebezi wambwashula. 

“Kasamulaho muuso nokandekile ni katengo kakamaiso ya Meatco, kuli katuse mwakufeleleza kulundulula libulaelo nikuli likwalulwe,” nekubulezi Misika. 
“Musebezi wakulundulula libulaelo nikuli likwalulwe nokalile fahala kweli ya Njimwana 2019. 
Kulundulula kuzamaile hande, mi pulao yapili itekezwi kuezahala Labulalu, mi kasamulaho libulaelo lika kwalulwa nikutambekwa mwamazoho a Zamco ni Meatco kuli likale kusebeza.”