Katengo kakabona zakuyaha mikwakwa ili kakazibahala kaRoads Authority (RA), kalumela kuli kukwalulwa kwamukwakwa walibima zemashumi aketalizoho kazepeli, obizwa Brendan Simbwaye kikwabutokwa hahulu. 

Libaka kikuli mukwakwa ukonisa bayahi baminzi yeli bukaufi kufumana lisebelezo zabutokwa, ili zembweshafaza mayemo abona akuitenga mwalitaba zalipisinisi. 

Zeo neli bulezwi kimuinasipula wakatengo kaRA Lily Brandt, ili wababañwi bane bapotezi Ndu yaMubuso viki yefelile. Musipili neli wakuyo itumela kuMueteleli Hage Geingob kakuzwelapili kususueza pabalelo yamikwakwa yanaha, ili yabutokwa mwakubukeleza naha ni kuhulisa sifumu.

Brandt namamezi kuli mukwakwa waBrendan Simbwaye noyahilwe kasinyehelo yamasheleñi alikana bolule bamyanda isupile (N$740 million), mi nokwaluzwi mwakweli yaNjimwana ñohola. 

“Wo kiomuñwi wamikwakwa sakata kuyahiwa kikatengo ka RA, bakeñisa zotiseza sicaba. Kanako yacwale sebakona kuitenga mwalikalulo zembweshafaza bupilo ni lisebelezo zalipisinisi. Kanako yakuyahiwa, lipisinisinyana nelibile ni kabelo, mi buñata bwalipinisi zeli mabapa neli fumani kabelo yende hala kuyahiwa kwamukwakwa,” nabulezi. Kwamukopano oswana muzamaisi wakatengo kaRA Conrad Lutombi naize kuna ni mapurojekiti abutokwa anze aezahala mwanaha, akafela silimo sa 2025.

“Lu añuzi mukwa wakukona kutalima taba yalinzila sihulu mwalibaka zamatakanyi, zesapatehi hahulu. Butata boluna ni bona kilinzila zezwa kwalibaka zalitaba zanjimo kuya kwamikwakwa yemituna. Kacwalo lubata kukwalula kalulo yeo, sihulu mwalibaka zecwale kalikiliti zepeli zaKavango, kakuli batu babañata baitinga fanjimo mwalibaka zeo,” naekelize. 

Muzamaisi wakatengo kaRA ulumela kuli kikwabutokwa kutalima litaba zeo, kuli nihakuna ni butata bwamasheleñi katengo kaRA kakasebeza katata kutahisa milelo yamuuso yakutisa zwelopili. Buñata bwa mapurojekiti akatengo kaRA anze atalelezwa atalimezi pono 2030. 

“Maikuto aluna kikubona kuli lukwalula linzila, kuli libyana zakena ni kuzwa mwanaha Namibia kuliba linaha zelibukaufi,” nekubulezi Lutombi.