Umwe womovalumenhu tava pangulwa moshikumungu shoFishrot Ricardo Gustavo okwa kupula omalaka onghela pefimbo a li ta yandje oumbangi momhangu yopombada komesho yomupanguli Herman Oosthuizen.
Omunamido 45 Gustavo, okwa lombwela omhangau kutya, ovafekelwa vakwao okwali va pulwa opo va fatulule kutya moshinima shoFishrot ove na mo olunyala ngahelipi, ashike ye kali a pewa omhito oyo.
“Ope na ovanhu tava ende va manguluka, va efiwa konima eshi va fatulula onghandangala oyo va dana, manga ame handi olele modolongo,” ta lombwele omupanguli.
Gustavo ta ti okwa li a endelwa po kopolifi omutenya wOsoondaxa –a endelwa nodokumente yokuhanda, ndele ta lombwelwa opo eke li yandje kositaasi yopolifi koAusspanplatz. Okudja opo ina lombwelwa kutya omolwashike a kwatelwa po.
Gustavo ta fatulula kutya ye kali e na mo oipambuliko mehangano loNamgomar Pesca Namibia Limiteda olo la li la nyolifwa moAngola.
“Ame okwali ashike director nomunailonga mehangano olo moNamibia,” ta fatululile omupanguli.
Shi na sha neudafano loku kwata eeshi pokati kaFishcor naNamgomar, okwa fatulula kutya olo eudafano lali pokati komauministeli, waNamibia naAngola –na kali nande oshitukulwa sheenghundafana. Ta ti Namibia okwali a pumbwa omukalelipo pefimbo leenghundafana kombinga yelongelokumwe loku kwata eeshi, sho osho nee a kongwa Jao de Barros omukwashiwana waAngola oo ve na naye ekwatafano liwa lopailonga opo e uye a longe onga director mehangano –kombinga yaNamgomar moNamibia –osho a itavela oku ninga.
Gustavo ta ti okwali yoo a shaina etwokumwe udafano pokati kaEsja Investment, ehangano lili koshi yaEsja Holdings, oyo i na ekwatafano noSamerji Holdings, ehangano olo tali dana onghandangala moshikumungu shoFishrot. Ta ti okwa shaina etwokumwe udafano eli, palombwelo laavo ve na mo oipambuliko mehangano.
Ta lombwele yo omupanguli kutya kali a kutwa pauyadi kehangano loNamgomar shaashi okwali e li omunailonga kuyadi mehangano lo Investec Asset Management Namibia –olo paife hali ifanwa Ninety –One Investment.
“Oilonga yange koNamgomar okwali oku li ufa keeveta nokomalandulafano ngaasha neequota odo tadi pewa Namgomar Limitada oku da kouministeli weeshi ngaashi naana tashi popiwa ketwokumwe udafano olo lili pokati keeministeli.”
Onda ninga oshinakuwanifwa ngaashi ondado yeequota deeshi, eelevi noshoyo otexa oyo ya kwatela moo VAT notexa yoovene vene –oyo nda futa.
Ta ti okwa wilika Namgomar Pesca Namibia ngaashi ta dulu nokwa fya oshisho kutya omikanda adishe domatwokumwe udafano odo da pumbiwa oda nyolwa, noda pungungulwa.
Ashike okwa patana kutya Namgomar Pesca Limitada okwali a pewa oquota youdjuu weemetric ton dili 50 000 kodula, ta ti etwokumwe udafano olo okwali ashihe lo50 000MT odo kwali tadi dulu oku teya po oshikondo sheeshi ashishe.
Moibofa ya taalelwa kuGustavo omwa kwatelwa shoku lunga litapula nosho ku ya kondje yokatendo koAnti-Corruption Commission, itatu yonghendabala youlunga nashimwe shoulunga.
Epangelo otali ti Gustavo okwa lya mo eemiliona N$22.4 moshikumungu shoFishrot. Onghela, Gustavo okwa li a pulwa okadaadaa komushiviveta wepangelo Clif Lutibezi oo li ta kwafelwa kuEd Mzarondedze. Ye okwa kalelwa po kuhahende Trevor Brockerhoff.
Gustavo opamwe novatamanewa vakwao Bernhard Essau, Sakeus Shanghala, Tamason naJames Hatwiikulipi, Pius Mwatelulo, Otneel Shuudifonya, Philipus Mwapopi, Mike Nghipunya naNigel van Wyk otava pangulilwa oshinima shoku dengela odi peisho noku tambula oifuta monyowa oku dja kehangano lokoIsland loSamherji opo li kale tali yulu eeshi domasbankera moNamibia.
Kelandulafano laavo ve na mo olunyala moshinima omo okwa wedwa yo omushiviveta Marèn de Klerk oo a fadukila po koSouth Africa. Epangelo fiyo opapa ina li tula mo onghatu yopaveta opo li ete ko De Klerk koSouth Africa nosho yo ovakwashiwana waIsland Ingva Júlíusson, Egill Helgi Árnason naAổalsteinn Helgason.
Epangelo otali ti ovafekelwa aveshe ovali ve na elalakano limwe. - rrouth@nepc.com.na