Ehangano lyo-MTC olya tameke nomandheulo gaanyasha ye li 50 mboka ya li ye shi pondola okuza momapulapulo gaantu 200.
Omadheulo ngoka oga tameke Omaandaha, taga ningilwa mOngwediva oshowo koWindhoek.
Omugandji gomauyelele mehangano lyokwaandjaneka omawi mombepo Erasmus Nekundi okwa ti mboka ya li ye shi pondola oye li 50, omwaalu ngoka ya kala ya hala noya li ya pula.
“Aanyasha mboka otaya dheulilwa omayithano ga yooloka ngaashi okukulula, okuhondja, okuthaneka, okupanda, okuninga iipanyala, okuopaleka iipala, okuteleka iikuki oshowo iikulya oshowo okutholoma oondhopi,” ta fatulula ngaaka.
Ta ti, omadheulo ngoka otaga ka ningwa kaantu ye na ontseyo ya gwana oshowo ya pyokoka nawa momayithano ngoka ga yooloka.
MTC omumvo gwa yi okwa li a pititha kutya ye, opamwe nomahangano galwe, oya gongele oshimaliwa shoomilliona N$1.4, okuyambindhindha aanyasha ya mana kiiputundhilo yopaungomba oshowo oopoloyeka ndhiikunino, oshilongo ashihe.
Sha ikolela komushangwa gwa pitithilwe omumvo gwa yi, omwa popiwa kutya omayambidhidho ngoka otaga ka topolwa paali, okukwathela oongeshefa oonshona nodhopokati oshowo okuyambidhidha iikunino, omolwekalekepo lyiikulya.
Omunambelewapitithi omukuluntu John Ekongo okwa ti oshimaliwa shoka okwa li sha gongelwa okupitila mopologalama kwa li ya totwa po tayi ithanwa “We Race Together”.
Ekongo okwa fatulula kutya opoloyeka yimwe tayi yambidhidhwa, oyoongeshefa oonshona naandhoka dhopokati, noya tengenekelwa okuyambidhidha aanasikola ye li pevi, yaana iilonga ye na ontseyo yokulonga koonyala ye li 50, ya mana kiiputundhilo yopaungomba. “Otwa hala okuyayambindha noshimaliwa shoku landa iilongithomwa yawo, okulonga shoka ye na ontseyo musho, opo ye ye po niilonga oshowo okukuta yalwe,” ta popi ngaaka.
Ta gwedha po kutya aanyasha ya mana omayilongo gawo ye thike poopelesenta 40, ye na ontseyo yokuya po niilonga yokoonyala, oya taalela oompumbwe yiilonga.
Oyendji oye na ontseyo, ihe kaye na nkene ye na okuya po niilonga kuyo yene.
Ta ti, sho osho shoka ya yambidhidha aanyasha mboka 50 ya tameke okwiilongela kuyo yene.
vkaapanda@nepc.com.na