Batimisi bamulilo neba katazehile kulika kutimisa mulilo omutuna one ucisize ndu yamuyemeli wasilalanda saKabbe yaMutulo Lamubulo. Yabona zabubangoki mwasikiliti saZambezi, mubakweli kuyomuhulu wasipokola Evans Simasiku nanitifalize taba yeo. Kono naize hakuna taba yekwaluzwi
kwasipokola kakuli sene sitisize mulilo hasisika zibahala kale. “Ikona kuba kuli notisizwe kilintambo zamulilo wamagesi, kapa nto yeñwi, kono kanako yacwale hakuna taba yekwaluzwi nimapokola,” nekubulezi Simasiku.
Hana kupilwe kubulela fataba yeo Sisamu natolokile kuli mulilo nokalile kanako ya16h00, nihaike batimisi bamulilo neba lizelizwe kabunako, nebatilo fita kasamulaho ahola.
“Neba bonahala kusaitukiseza. Nebatile nitanka yesina mezi, mi nebanze bamatela kwanuka kuyoka mezi. Nebalikile kutimisa mulilo, kono nebapalezwi, kufitela batimisi bamulilo kuzwelela kwalibala lalifulai, habato fita kona bato kwanisa kuutimisa,” nekubulezi Sisamu.
Natolokile hape kuli mulilo nokalezi mwamuzuzu omuñwi. “Mulilo haukala neni lobezi, mufumahali waka nibanana babane nebaliteñi. Neni zusizwe feela kimuhuwo wamusalaka, hana ayozwa fande,” nabulezi.
Natolokile hape kuli mulilo nokonile feela kutimiswa kanako ya21h00. Natolokile hape kuli sinyehelo kaufela yalibyana hakusa baliwi ndu nelikana N$200 000.
“Hanizi kuli nikatoloka cwañi taba ye, kono kisinyehelo yetuna,” nabulezi.