KATIMA MULILO – Misebezi ya babalikana myanda ye mine neile ni musi, kasamulaho mulilo omutuna nosinyize muyaho walintolo, walule lwa masheleñi Labune mwatolopo ya Katima Mulilo. Lintolo ze silezi kungelela cwalo ni Shoprite, Pep, Clicks ni Hungry Lion neli sinyizwe ki mulilo. Kukulubelwa kuli mulilo nokalile kakusasa kanako ya 04h00, nihaike batimisi ba mulilo mwatolopo neba itahanezi kuya kwateñi, neba palezwi kutimisa mulilo kakuli motikala ya bona nebatilo tuka ni yona, kaku kulubelwa kuli nenatilwe kilika zene fufa kuzwa mwamulilo.
Muzamaisi wa tolopo Raphael Liswaniso yana bile wabapili kufita kone kutuka mulilo, naize mulilo nokalezi mwasintolo sa Shoprite ni kuya kwalintolo zeñwi. Liswaniso uakaleza kuli mulilo notisizwe ki mulilo wa magesi. Kasamulaho tolopo nefelezwi ki mulilo wa magesi kanako ya 03h00, mi nokutile mizuzunyana pili hola ya 04h00 isika kwana kale. “Mulilo nokalezi kwamulaho wa sintolo. Buñata bwa batu ba akaleza kuli nokalezi mwaliapehelo,” nekubulezi Liswaniso. Naekelize kuli mulilo neli omutuna mi motikala yabona nesa kwanisi kutimisa mulilo, mi naize habana lisebeliso sakata.
Balwanisi ba mulilo bakwa Mpaca niba mwamutayi wa za mishitu neba bizizwe kuli bato tusa kutimisa mulilo. Kono nihane batile neba palezwi kutimisa mulilo. Kusaba ni mezi mwatolopo nikona nekusika tusa, mi batimisi ba mulilo nebana ni kuyoka mezi kwa nuka ya Lyambai. “Haluya kwa kampani ya NamWater seluyo fumana kuli nekusina mezi mwasibulukelo. Mi seluyo lemuha kuli kuna ni paipi yene punyehile kwa waterfront. Kacwalo mezi mwasibulukelo neli amanyinyani, kacwalo nelusakoni kupompa mezi kanako yeo.
Nelukandekile ni NamWater mi neba kwaluzi pompi yeñwi yenyinyani kutaza sibulukelo,” nekubulezi muzamaisi. Muyemeli wa tolopo Lister Shamalaza naize kezahalo neli sinyehelo yetuna. “Luikutwa maswabi kuli muyaho mone kuna ni lintolo mone babeleka batu baluna ucile. Kona fone bapilela kufumana mali kwamafelo akweli kutusa mabasi abona,” nabulezi. Yomuñwi wabeñi bamuyaho kuzwelela kwasikwata sa Coimbra nahanile kubulela.
“Hanina sa kubulela. Hanizibi sa kubulela. Masola feela alikana bolule babane ba masheleñi,” nabulezi kabukuswani. Muongaongi wa zabubangoki mubakweli kuyomuhulu wa sipokola Evans Simasiku naize sene sitisize mulilo hasisi kazibwa kale. “Lipatisiso lika zwelapili. Luka kwalula taba ya kucisa mulilo, mi lipatisiso lika ezahala hala sesi tisize mulilo. Ukalezi kai? Neli mwahali kapa fande? Kono senibata kubulela ki kuli, haiba kezo ya busatani ye ezizwe fa, ne ezizwe kabomu ki mutu, haka fumanwa uka zekiswa,” nekubulezi Simasiku.