Omunambelewawiliki wodoolopa yaEenhana Gabriel Benjamen okwa kunghilila ovalandifi vomapandaanda opo va xulife po okulandifila peenhele odo inadi pitikwa kumuni.
Okwa ti elelo lodoopola ola taalela eshongo linene lovakwashiwana tava landifile keshe pamwe, nopeenhele da futilwa koovene.
Gabriel okwa ti ombelewa yaye oya kala nokumona omanyenyeto taa di kovanangeshefa nokoohandimwe omolwovanhu tava landifile peenhele davo, nokomesho yeengeshefa davo.
“Omunhu ngeenge ota landifile ponhele ihe shi yaye na lopotwe. Mwene wonhele oku na oufemba wokutaataya po omunhu keshe ta landifile ponhele yaye.
Nongeenge omunhu ina hala okudja po na lopotwe keembelewa damuni opo a katukilwe onghatu yopaveta,” ta ti.
Edi Benjamen okwe di popya oshivike sha dja ko pefimbo kwa li muni a ninga omutumba novanangeshefa hava landifa momupandaanda mEenhana.
Okwa yelifa ta ti elalakano lomutumba okutukulilafana omayele kombinga yomilandu da tulwa po nokutula po elongelokumwe pokati kovakwashiwana namuni.
“Muni wEenhana ota lalakanene okukala a kwashilipaleka kutya ovalandifi vomomapandaanda otava landifile pomidingonoko diwa nope na oukoshoki,” ta ti.
Onghee okwa yelifa ta ti ovalandifi vomomapandaanda ova ninga vahapu paife modoolopa naashi otashi ka eta muni opo a kale a longekida onhele ipe yolandifila.
Benjamen okwa weda po ta ti muni okwa taalela yoo vali eshongo linene lovakalimo vomodoolopa ve na oshimaliwa sheendjo eemilliona N$37 domayakulo amuni di li konima okudja omudo wa dja ko.
Okwa ti oshiwana nashi kale tashi kwatafana neembelewa damuni ngeenge shi na oupyakadi wokufuta omayakulo amuni opo ku kale kwa ningwa omalongekido kombinga yeendjo davo.
“Osha fimana ngeenge oshiwana tashi futu omayakulo amuni shaashi oshimaliwa osho hava futu ohashi longifwa oku eta omayakulo modoolopa ngaashi okuyambula po odoolopa i kale pamafiku muwa,” ta ti. –fhamalwa@nepc.com.na