Omupopiliko woshilando shaWindhoek Lydia Amuyenya okwa kunghulilwa opo shi kale shili oupafi nokukala sha kotoka ngeenge tashi xwike oimbodi opo shi kwashipaleke eameno lomaumbo avo noshoyo oshilandopangelo.
Amutenya okwa ti okwa didilikwa unene omapeya ta pi komundilo moshilandopangelo, nota hokolola ta ti neudo oku na oimbodi ihapu ei ya eta opo oWindhoek ikale i na omapeya ahapu.
Amutenya okwa hokolola ta ti elelo loshilando shaWindhoek oli na oshisho noshiwana notali lalakenene okukelela omindilo meni nokondje yoshilandopangelo. Onghee ota ti oshiwana nashi xulife po okukala tashi xwikile oimbodi keshe pamwe ngaashi peenhele edi di na omwiidi muhapu wakukuta tau dulu oku tandaveleka omundilo noupu.
Okwa ti oshiwana nashi xulife po okukala tashi ekele oimbudi keshe pamwe, onghee ota ti oimbodi nai tulwe ponhele da dandjwa kumuni opo kukwashipalekwe kutya oshilando oshi na oukoshoki.
Amutenya okwa denga omufindo ta ti oiponga yomindilo nai kala tai lopotwa meendelelo keembelewa davo konomola yongodi 061211111 opo ovanhu ava vena oshinakuwanifa shokudima omindilo va kale va fika diva peenhele edi tadi pi.
“Oshiwana ina shi pumbwa okukala tashi xwike oimbodi ngeenge kuna omhepo shaashi eshi ota shi eta opo omundilo u kale tau i nomhepo ndele tau tomeke omiti ile omwiidi. Onghee eshi oshi li osha nyika oshiponga neenghono okukala ovanhu tava xwike kuna omhepo,” Amutenya ta ti.
Okwa ti ngeenge ovanhu tava xwikile oimbodi meni leehofa davo na va kale vakwashipaleka kutya ovalombwela ovashiinda shavo tete, ye ta ti konima ngeenge omunhu okwa mane okuxwika oimbodi na kale akwashipaleka kutya omundilo owa dima filufilu opo ku kelelwe oiponga yomindilo.
Okwa weda po ta ti ovanhu ova pitikwa ashike okuxwika oimbodi okudja potundi 10h00 fiyo 16h00.
“Natu longeleni kumwe opo tu kelele omindilo domapeya moshilando shetu, fye natu kele ke i po oukoshoki moshilando shaWindhoek,” Amutenya ta ti.