Mwene womukunda Okambebe Filemon Nghipangwa okwa wedelwa ko eemwedi mbali dokukala pedu eshi vati a li a patela oikulya yoshikukuta mondingosho yaye.
Edi oda kolekwa kelenga mwene woshikandjo Omungwelume Linda Mwaetako eshi a hokolola ta ti ombelewa yaye oya tokola okulelepeka efimbo lokukala pedu kwaNghipangwa neemwedi mbali. Kakele koshiningwanima shomo2020 omo mwene womukunda ou vati a patela oikulya mondingosho omo ya oloela, ota popilwa yoo oku tendulula nokukufa ko omapya ovanhu nosho yo okulandifa edu kondilo, oinima aishe ei oya li ya eta opo a kufwe moilonga muMei neudo.
Okwa ti ovakwashiwana ova hoolola okanguduwiliki taka kala taka wilike omukunda oule weemwedi odo Nghipangwa e li pedu.
Mwaetako okwa lombwela Kundana ta ti ombelewa yaye inai mana okuninga omakonakono koshikumungu shokutendulula omapya ovanhu. Ta ti otava ka mana ashike muAguste.
“Ovanhu vamwe ava ve na omapya avo a tendululwa ile va landifwa edu kondilo ove li komaushimba onghee otwa teelela ovanhu ovo fye tu dule oku va ningila omapulapulo kombinga yomadu avo,” Mwaetako ta ti.
Mwaetako okwa kunghilile oshiwana opo shi longele kumwe novawiliki va hoololwa mewiliko lomukunda.
MuMaalitsa eshi ovakwashiwan va ningile ehololokmadiladilo li li omhinge naNghipangwa, umwe womovakalimo womOkambebe, omukulupe weedula 65 okwa lombwelele Kundana ta ti ova uda nai neenghono eshi oikulya yoshiwana ya kala ya patelwa monduda ya mwene womukunda oule wefimbo lile omanga momukunda waye mu na ovanhu va dengwa kondjala onghee okwa ti kutya inava hala vali okulelwa kuNghipangwa shaashi ke na oshisho noshiwana.
Nghipangwa okwa li a nyamukula ta ti kakwa li e shi ngeenge monduda yaye omu na oikulya yoshikukuta shaashi konduda okwe lixula ko okuya ko momudo 2020.