“Ke hole vali okukala meumbo, oha kala ashike a fikama pombila apa kwa li pa fudikwa mumwaina. Ngeenge a nangala iha kofa nawa shaashi oha nhukamo oufiku meemhofi.” Aa omatumbulo a Indileni Nghidimbwa, ina yokaana kokamati oko ka tala mumwainamati Johannes Nghidimbwa(16) ta dengwa fiyo omefyo kuina mumwaina waina. Oshiningwanima eshi shikumwifa osha ningilwe pexulilo lo2018, ashike oipongolo yaJohannes opo ashike ya monika omwedi ou, konima eshi ina younona ava vavali a ka pula opolifi opo i ka lafulule ponhele opo kwa li taku fekelwa kutya opo pa fudikwa okaana oko. 

Hilde Kalola (39) mumwainakadona waIndileni Nghidimbwa oo ta fekelwa medipao laJohannes Nghidimbwa okwa kwatwa po kuyele omwedi ou, nokwa li a teelela epangulo molwedipao lokaana oko.  Indileni Nghidimbwa ota hokolola kutya okaana kaye oko paife ke na omido 16 otaka hepekwa komadilaadilo, ta ti oshe ka etela nokuli opo ka dje mo mofikola.  Ta hokolola ta ti nonande okaana oko ka kala taka monika ka fa kehe na ko nasha, onghalo yako oya lunduluka okudja efiku ka mona olutu lamumwaina tali fudulwa mo kopolifi. 

“Okwa li ngaho a mona omhito opo a mone ovaxungimwenyo koshipangelo kEngela, ashike eshi inashi mu kwafelasha nande. Paife ngaha omwedi ina ya ko kofikola 

 “Vati ngeenge a kofa oha kala ashike a fa e wete omukulu waye, unene tuu eshi a monene okudja efiku a mona olutu lanakufya la fudulwa medu kopolifi, fiku tuu olo okwa dja po ehe na omhepo yokukala meumbo shaashi oshi li komutima waye alushe,” Nghidimbwa ta ti. Pefimbo oshiningwanima eshi shitalala okamati aka oka li ka hokololela Kundana nghene ko noundenge vako va ninga eendobwedi pefimbo Kalola a denga okamati oko koshiveli shavo fiyo omefyo mo 2018, vati shaashi ka vaka poo N$500 yaye.  “Okwe tu pula opo tu kwate John, ndele te mu mangele kombete. Nghee ngoo e mu denga okudja po24h00 youfiku fiyo po 06h00 yongula. Okwa li ngaho ta kwena petameko, ta popi fiyo ta mwena ita popi vali.  “Eshi kwa sha okwe mu tila omeva, ndele ine linyenga. Okudja opo meeHilde okwa ti natu ka fe elambo vati tu fudike mo eendooxa, naashi twa mana atushe okwa ti natu dje mo meumbo. Eshi twa ka aluka otwa hanga John ehe po opo a li a nangala, nokatololi ke na eehonde. Eshi twa ka ya kelambo olo twa fa otwa hanga la fufilwa nale,” osho okaana aka kwa li ka hokololela Kundana.