Omupopiliko kouministeli weendjila noyeendifo Julius Ngwenda ota ti omolwa efimbo, oministeli yavo oya taalela omashongo ngeenge tai longekida omapako opapangelo.
Momafiku 06 Juli omo amuke, omupresidente Hage Geingob okwa ingida omapako opapangelo oo nakufya ovaleli va kwatela mo Ngarikutuke Tjiriange, Ohamba Kilus Munjuku Nguvava, Priscilla Kavita, Nakale Leo Mweshilengelwa, Bernadinus Shekutaamba naColonel Gallen Molokwe.
Ngweda ta ti ove na eshongo linene ngeenge tashi ya pomamanya okeembila dovanhu a va tava ningilwa omapako opapangelo shaashi ohamadi konhele imwe ashike.
“Oministeli yetu oyo ya pewa oshinakuwanifa sho ku landa omamanya okeembila, omo hatu ma lande koKaribibi. Onghee ohatu hange tuli moupyakadi wefimbo lokukambeshitela omamanya shaashi omapako amwe oha kala endelela unene. Hano eshi oshili oupyakadi wadidilikwa nokoministeli yetu unene tuu pefimbo eli tuna omapako opapangelo a ninga ahapu,” Ngwenda ta ti.
Okwa denga omufindo ta ti omukifi ou owa nyika oshiponga, onghee hano oshiwana natu liufeni komalombwelo oo atulwa po oCovid-19.
Meenghundafana a ninga naKundana Ngwenda okwa hokolola ta ti unene tuu peemwedi edi okwa didilikwa ovanhu vahapu va fya mepangelo onghee ovanailonga mouministeli wavo ove li pyakidila efiku keshe tava ningi omapako mahapu opapangelo moshilongo ashishe.
Ngwenda okwa yelifa ta ti neudo oministeli yoyeendifo oya ninga omapako mahapu opapangelo ovanapolitika va fya.
“Keshe efiku ohatu longekida oyeendifo, oipundi yo kukala omutumba ovanhu ngeenge veli pomaendo, outala vomudile vo ku tula pomaendo opo va kale va kalongifwa komapako ovanhu va xulifa, a av va pewa omapako opapangelo. Onghee pefimbo eli oilonga oya ninga ihapu unene shaashi omalongekido omapako opapangelo okwa ninga ahapu unene,” Ngwenda ta ti.
Ngwenda okwa popya ta ti oministeli yavo oye lilongekida okukala ya yandja omayakulo oku ninga omapako opapangelo ngaashi naana ya pewa oshinakuwanifa eshi kepangelo.
“Otuli mefimbo lidjuu lombuto yoCovid-19 tai dana onghandangala moshilongo, omo ovanhu vahapu va fya omanga vamwe ova kwatwa kombuto ei. Hano omonisteli yoyeendifo otai kwashipaleke kutya ovanailonga aveshe ova amenwa pefimbo tava ningi omapako opapangelo shaashi navo ovena omito yo kukala va kwatwa kombuto ei. Onghene hano oikwafifo aishe opo ili ya wana efimbo keshe ovanhu tava ningi omapako,” Ngwenda ta ti.