Okaana kokakadona keedula mbali oka fya eshi ka pila monduda yokunangala komukunda Andambo Mbali moshitukulwa shaShana.
Oshiningwanima eshi osha ningwa efimbo lokomatango Olomakaya. Omupopiliko wopolifi moshitukulwa shaShana Inspector Thomas Aiyambo okwa hokolola ta ti okaana okwa li ke li monduda mwa temwa omundilo woku eta oupyu molwa outalala. Vati manga okaana ka nangala omundilo omwa haka fiyo tau li hanene mobashu aishe.
Omukainhu oo ha kala nako meumbo vati okwa hangika a ya kepata koo okaana keli konduda pefimbo onduda ya yaka omundilo. Opolifi oya hokolola tai ti eshi vati omuneumbo oo pamwe novashiinda va ka dima omundilo ova hanga nale okaana ka pya po filufilu onghee inava ka dula vali okuxupifa okaana. Opolifi oya kunghilila oshiwana opo shi kale sha kotokela omindilo pefimbo eli loutalala shaashi osha nyika oshiponga neenghono. Opolifi oya weda po otai ti ovadali nava kale a lushe tava konakona omalinyengo ounona momaumbo opo ku kelelwe ounona vaha ninge oihakanwa yokupya komindilo ile okuwila momavela omeva.
– fhamalwa@nepcc.com.na