OMUTHIYA-Okaana kokamati keedula ntatu oka xulifa Osoondaxa konima eshi ka lyatwa kokatemba kotuwa ta i shingwa kuxe.
Oshiningwanima eshi shi nyemateka osha ningwa eshi okatemba taka nanwa kotuwa yoToyota yobaki oyo ya li tai shingwa kuxe yokaana aka wedina Joel Frans Nambahu ka puma okaana noku ka ehameka neenghono. Oshingwanima eshi osha ningilwa komukunda Oshivelo. Okaana oka li ka twalwa meendelelo kokaklinika kopomukunda opo ashike oka fya eshi taka fiki poshipangelo. Ouyelele ou owa kolekwa kopolifi mOshikoto.
Okwa patululwa oshibofa shedipao lihefi loshiningalawina.
Natango tuu mOshikoto, opolifi oya kwata ovalumenhu vavali molwaasho va hangwa tava shingi eetuwa vehe na eembapila dokushinga, ndele oituwa oyo tai i moiponga.
Oshingwanima shotete osha ningwa eshi omunamido 48 a puma omweendi wokolupadi pomukunda Ondiika, popepi nOmuthiya mopate yoB1.
“Otaku hokololwa omushingi wotuwa yoIzusu yonomola N30591W, okwa li tai shingwa i li kombinga yondjila kwa puka eshi ya puma omweendi wokolupadi oo a li ta ende a lambalala opate. Omweendi wokolupadi ou okwa li a mona oshiponga neenghono nokwa li a twalwa meendelelo koshipangelo shepangelo kOmuthiya ashike omo okwa pitilala mo ashike nokwa twala kOshakati,” omushangwahokololo wopolifi ta u ti.
Oshiningwanima oshitivali omo mo omunamido 22, oo kakele kokushinga ehe na oufemba, taku tangenekwa kutya okwa li yoo ta shingi e li koshi yodungo.
Opolifi oya hokolola kutya omushingi wokatuukala koToyota Corolla okwe lipuma mumwe nobaki yoNissan mepandavanda laDr Hage Geingob. Oshiponga osha ningwa lwopotundi 04h00 mEtitano.
Ovashingi aveshe ava vavali okwa teeleliwa natango va holoke momhangu omolwa oimbuluma oyo.