Omhangulilo yaMangetalata mOndangwa oya anyena Maria Ndilula (26) opo eli futile mo modolongo, omolwa oshibofa shedipao.

Ndilula ota tamanekelwa ediapo lomukainhu mukwao oo vati a li e na oulema womatwi, pefimbo vali tava lu, tava kondje naye omulumenhu oo ali e li mekwatafano lopaihole novakainhu ava vavali. 

Nakufya oye Helaria Namuteya Namupala womido 33, a dile kOnguta mOndangwa.

Eshi a holoka komesho yaMangestalata mOmaandaxa, Ndilula okwa anyenwa oku lifutila modolongo, noshibofa shaye osha undulilwa komafiku 05 aKotoba opo ku ningwe omakonakono omoule. Kali a pewa omhito yokutya sha.

 Ndilula vati okwa dipaa omukainhu mukwao Etitano efimbo lokomatango kolukanda ledina Uupopo eshi kwali teve li dengele omulunhu ou naye e na oulema womatwi.

Omukainhu ou ikwa hokololela Kundana kutya Namupala okwali e na ekwatafano lopamilele nomulumenhu waye ou va kala naye oule weedula dili hamano mopaife.

Ta ti nakufya naye okwali ngaho okakadona komulumenhu oo, ashike ekwatafano lavo ola xula po nale nale manga veli kofikola, nomanga omumati ina ya mekwatafano naNdilula. Pokati opo –pefimbo Ndilula veli mekwatafano nomulumenhu –Namupala nomulumenhu oo mbela ova ka nyumuna po vali ekwatafano lavo, naashi osho sha eta oita pokati kovakainhu ava. 

Ta ti tete nakufya okwe mu denga nodopi moshipala, yee vali okwa li e na ombele meke a hala oku mu twifa monhulo. Onghee hano nee efimbo okwa li tava lu, Ndilula okwa pondola opo a nyeke ko ombele oyo kwa li ili meke laNamupala ndele ta tu mukwao loikando ivali monhulo. Namupala opo a xulifila ponhele opo oshiningwanima sha ningilwa. 

Omutanekwa okwa dile kOhadiwa moshitukulwa shaHangwena..