Omukainhu weedula 35 vati okwe li kufa omumwenyo pamukalo tau difa omaxwilili, eshi elixwikila meumbo konguloshi yEtitano mOluno, moshitukulwa shaShana.
Nakufya oye Aina Nelago Neema omukalimo wodoolopa yaNdangwa.
Omupopiliko wopolifi moshitukulwa shaShana Inspector Thomas Aiyambo okwa hokolola ta ti nakufya okwa kala ta hepekwa kefindakano lomadiladilo efimbo lile, naashi otashi dulika osho shemu eta fiyo opondodo yoku li kufa omwenyo. Opolifi ya hokolola kutya nakufya okwa kufa omaholi ndele ta tile monduda yaye yokungala, nosho yo kolutu laye alishe, nokonima ta tema ne omundilo.
Aiyambo okwa ti ovaneumbo vaNeema ova lopotela opolifi meendelelo ashike oya fika oya hanga nale a xulifa.
Otaku hokololwa omukainhu ou a fiya po omukanda oo a shanga kutya okwa udifwa nayi kuumwe womovakanedimo laye, naashi osho she mu twala fiyo oponghatu yoku li kufa omwenyo.
Momukanda omo tuu omo okwa ti ota pandula unene ovadali vaye, nokahewa kaye aveshe eshi va kala tave mu yambidida.
Aiyambo okwa kunghulila oshiwana opo shi kale tashi kongo omakwafo exungomwenyo kovapolifi, ile kovafitahongalo nokovaxungimweno ngeenge she li hanga shili moupyakadi woludi latya ngaha, ponhele yokulikufa omwenyo.
Oshiningwanima shikwao vali shomundilo osho mukulupe weedula 63 naye a fya eshi apila mobashu mexuliloshivike moWalvis Bay potundi 02h00 yokeengula. Nakufya oye Namhindo Victor.
Vati ovashiinda ova hokolola kutya omukulupe ou kwa li ha longifa okalexita shaashi vati ita dulu oku futa olusheno vali.
Ovakwapata vaye ova shiifilwa efyo laye, nomakonakono opolifi otaa twikile.