New Era Newspaper

Icon Collap
...
Home / Omukulupe a kwatwa koonkondo

Omukulupe a kwatwa koonkondo

2021-01-05  Victoria Kaapanda

Omukulupe a kwatwa koonkondo
Top of a Page

Omukulupe gwomimvo 67, okwa kwatwa koonkondo komulumentu anuwa e na uunkundi wopamadhilaadhilo gwomimvo 33, momukunda Eyanda moshitopolwa shaMusati.

Omukuluntu gwopolisi moshitopolwa moka Titus Shikongo okwa ti, oshiningwanima shoka osha holoka potundi 15h00 yomutenya Etine lya zi ko momudhingoloko gwOutapi.
“Ethimbo oshiningwanima shoka sha holoka omukulupe ngoka taku hokololwa kutya iha uvu ko omakutsi, okwa li mo nokatekulu ke komimvo mbali megumbo,” Shikongo ta ti ngaaka.

Otaku hokololwa kutya, omulumentu ngoka okwa li a yi megumbo ndyoka lyopuushiinda shawo, e ta kwata omukulupe ee te mu thingonona othingo tango omanga ine mu kwata koonkondo. Shikongo ta ti, omufekelwa moshiningwanima shoka okwa mangwa po kopolisi. Moshiningwanima inaashi faathana, opolisi moshitopolwa shaMusati oyi li molukongo lwaafuthi ya yugu nokufika ombelewa megongalo ngeleki lyavangeli, Ombongodhiya. “Oshiningwanima shoka osha holoka Omaandaha ga zi ko omanga omusita gwongalo ngoka ha zi oye awike a li a zapo,” Shikongo a popi ngaaka. Ta ti, aafuthi oya li ya yi ontuku nokompiyuta yo peke yongushu N$4 000, e taya fike po oombiimbeli, omayimbilo oshowo oombapila dhilwe dha simana poshitamufa shomusitagongalo.

Otaku hokololwa kutya aafuthi mboka okwa li ya pitile pekende okuya meni lyombelewa, nokwa ndhindhilikwa kutya kasha shi oshikando shotango ongeleka ndjoka tayi teywa. Omusita gwongeleka yopambepo Matias Lukas okwa ti, okwa koneke iipotha oyindji tayi lopotwa yoongeleka tadhi yugwa koombudhi, nelalakano lyiimaliwa oshowo oongendjo. “Nhindhilikeni kutya ehala ndyoka tamulongele uuwinayi, olya yambekwa. Ehala lyi na okutilika nokusimanekwa, ihe omwiininga kaamu tila sha. Tu simanekeni oongeleka.

Lukas ta ti, ndhoka okwe dhi popi sho a uvu nayi konkundana ndjoka. Takumagidha ta ti, okuyuga ongeleka ondjo onene koshipala shaKalunga ihe nashi hulithwe po.


2021-01-05  Victoria Kaapanda

Share on social media
Bottom of a page