Kansela woshikandjohoololo shaKongo Efraim Shipindo onghee ngaa ta twikile nokuyambidida ovakulupe moshikandjohoololo shaye.
Shipindo okwa yambidida omukulupe weedula 83 eshi a yandja okatemba ku Immanuel Philipus momukunda Ohenghono, moshitukulwa shaHangwena.
Okwa didilikwa omukulupe ou a kala eli momhumbwe yokatemba shaashi iha dulu oku enda.
Pefimbo ta yandje okatemba Shipindo okwa ti ombelewa yaye oina oshisho noshiwana eshi shi li momhumbwe, onghee otai kwashilipaleke kutya otai yandje omakwafo kovakulupe.
Shipindo okwa popya ta ti ota ka kwefela ovakulupe aveshe vomoshikandjohoololo shaye veli momhumbwe yoikulya ile oikwafifo yomomaumbo.
“Ngaashi naana kwa li nda udanekela oshiwana shomoshikandjohoololo shaKongo kutya ohandi ka yandja omakwafo kovanhu aveshe tava mono oixuna ngaashi ovanyasha, ovakulupe, novanhu vena oulema,” Shipindo ta ti.
Okwa denga omufindo kutya oshiwana na shi kale tashi kwatafana nombelewa ngeenge shapumbwa omakwafo, opo ombelewa yaye ikale ya ninga omalongekido nghee oshiwana tashi ka kwafelwa.
Okwa ti onghee nga natango ta indile moshiwana opo shi twikile nokuyambidida ovanafikola voukadona veli momhumbwe yoututa shaashi okwa didilikwa oukadona vahapu hava faula keetundi ngeenge veli komafimbo shaashi kave nasha oututa wokulikwafela.
Onghee okwa ti keshe ou ena ehalo lokuyambidida ovanafikola voukadona na kwatafane nombelewa ile a kwatafane nakasela kongodi yaye yopeka.
“Ina ndi hala oku mona omunhu eli moshikandjohoololo shange ta mono oixuna kondjala, onghee onda hala oku longa nondjungu opo ndi kwashipaleke kutya ovanhu veli momhumbwe yoikulya ova pewa omakwafo oikulya,” Shipindo ta ti.
Shipindo okwa kunghulila ovanyasha opo va kale veli kaleka kokule nokulonga oilonga yoimbuluma ngaashi okuvaka, okutuka ovakulunhu nokudipayafana shaashi kashina elao.
Okwa ti ombelewa yeya oina ondjodi ya kula opo ikale ya tota po eepoloyeka dovanyasha ngaashi ounamapya opo ovanyasha va kale tava longo oikulya yavo vene nokukala tava landifa opo a dule okukala va mona oshimaliwa.
Okwa weda po ta ti oshiwana na shi xulife po okukala tashi ende eendjiladiledile ngeenge shapumbwa ombelewa yakanasela, ndele na shi kale tashi kwatafana nakansela kongodi yaye yopeke.
“Otandi kunghulile oshiwana opo tu kale a tu longele kumwe opo tukondjife ondjala noluhepo,” Shipindo ta ti.