Omukulupe womido 60 nomunailonga waye ova fininikwa nokukufwa meumbo laye ndele tava ka fiwa molukanda kovapolifi voipupulu. Oshiningwa eshi osha ningwa Omaandaxa efimbo lokomatango momukunda Ohambungu moshitukulwa shaNgwediva. Omupopiliko wopolifi mOshana Inspector Thomas Aiyambo okwa hokolola ta ti omukulupe ou a li omuhongifikola opo a panzelwa okwa hangika meumbo nomunailonga waye womukainhu. Okwa ti ovafekelwa ve li vatatu vovalumenhu noshoyo omukainhu umwe ova lombwela omukulupe kutya vo ovanambelewa vopolifi va dja koshitaashi shopolifi kOngwediva.
Okudja opo vati omufekelwa umwe okwa u likila omukulupe okakalata kaye koipupulu kutya vo ovapolifi.
Opolifi oya hokolola tai ti ovafekelwa ova pula omukulupe pamwe nomukainhu oo opo vaye navo koshitaashi shopolifi mOngwediva opo va ka shaine omikanda donhumba. Okudja opo ovafekelwa ova lombwela omukulupe kutya MTC okwa pula opolifi opo i kale tai mu kwafele shaashi oha mono omatumwalaka okudilila keenola dihe shivike.
Opolifi oya ti ovafekelwa ova tameka okupula eeshapi dotuwa yomukulupe oyo kwa li ili meumbo va ti opo vaye nayo ashike omukulupe okwe shi anya.
Nokonima yefimbo ova pula omukulupe opo a yandje okamutwe kaye koshilongo, neengodi davo dopeke noshoyo okakalata kaye kombaanga.
Va ti konima eshi omukulupe eshi a yandje oinima yaye ova dja mo meumbo notuwa yovafekelwa yoCorolla itoka yonomola N762SH va uka kopolifi yaNgwediva.
Eshi ve li mondjila ovafekelwa ova kala tava pula omukulupe omapulo e na sha noshimaliwa shaye shopendjela kutya oku na ko ingapi komavalulilo ombaanga yaye ashike omukulupe okwa kala a limbililwa komupulo avo.
Vati eshi va fika popolifi yaNgwediva ova pitilila po fiyo omukulupe ta pula kutya ova uka peni ashike ova nyamukula kutya otava i kopolifi yaShakati kOkave.
Eshi va fika kOkave ova tanauka ko ndele tava shingi fiyo omolukanda laNeshila. Omukulupe pamwe nomukainhu oo ova tulwa molukanda laNeshila ndele tava pewa oinima yavo nokudja opo ova lefa va uka keumbo.
Opolifi oya ti inava monifwa oshiponga. Opolifi oya kunghilila oshiwana opo shi kale sha kotoka ngeenge sha hangika kovanhu vehe va shi shaashi ovanhu ove lininga paife ookalyamupombo vokutula ovanhu mokatoo.
– fhamalwa@nepc.com.na