Omukulupe weedula 102 okwa fya efyo linyanyaleka konima eshi a pila monduda yaye yokunangala pefimbo kwa li vati ta shili omakaya.
Oshiningwanima eshi osha holoka mOmaandaha momukunda Engoyi moshitukulwa shaShikoto efimbo lokonguloshi.
Nakufya okwa tongololwa oye Elizabeth Uupindi omukalimo womomukunda Engoyi.
Omukulunhu wopolifi moshitukulwa shaShikoto Komufala Teopoline Kalompo-Nashikaku okwa hokolola ta ti Uupindi okwa li a nangala monduda yaye pefimbo loshiningwanima shomundilo.
Vati omukulupe okwa tema okapalwa opo a dule okushila omakaya onghee naashi osha ka eta etalashe opo a li a nangala li teme omundilo.
Opolifi oya hokolola tai ti umwe womovaneumbo okwa ka mona monduda yomukulupe tamu di omwifi. Ovaneumbo ova lotoka opo va ka dime omundilo ashike omukulupe okwa hangika nale a xulifa.
Opolifi oya hokolola tai ti monduda yomukulupe omwa hangika okapalwa onghee naashi otashi ulike kutya okwa li ta shili omakaya.
Otaku hokololwa kutya Uupindi okwa li a xulifwa po okushila omakaya kounona vaye ashike vati okwa kala ta twikile nokulivakela okunwa omakaya ngeenge e li monduda yaye.
Opolifi oya kumaida oshiwana opo shi kale sha kotoka ngeenge tashi tema omindilo unene tuu pefimbo e li loutalala. – fhamalwa@nepc.com.na