Omulumenhu weedula 29 okwa fya eshi e liyasha nondjebo meumbo lavo lwopotundi 20h20 Omaandaxa molukanda Ombili moWindhoek.
Nakufya kwa tongololwa oye Paulus Messia Shapopi e li omunafikola koBrazil te lihongele oundokotola. Omupopiliko wopolifi moshitukulwa shaKhomas Warrant Silas Shipandeni okwa hokolola ta ti Shapopi tete okwa kala a hala oku likufa omwenyo keumbo lovakwapata vaye li li moWanaheda pefimbo a li eke va talela po.
Vati ovakwapata ove mu lombwela opo ehe likufe omwenyo ashike konima okwa faduka po ndele ta londo molefa a uka keumbo lavo.
Opolifi oya hokolola tai ti konima yefimbo eshi ovaneumbo va ka tala monduda yaye okwa hangika e li mekungu lohonde a xulifa nondjebo ye mu kalela.
Shapopi ina fiya po omukanda tau yandje ouyelele kombinga yefyo laye onghee omakonakono opolifi otaa twikile. Eshi a kwatafana naKundana omuxungimwenyo moshipangelo shaShakati Tuwilika Kalunduka okwa ti ovanyasha ovo unene va ninga oihakanwa yokulikufa eemwenyo, hava hepekwa koupyakadi wopamadilaadilo shaashi kave hole oku ka konga omakwafo kovaxunginwenyo.
Okwa ti unene tuu ovalumenhu ovo vamwe ihava holoka koipangelo ngeenge ve na oupyakadi ile tava vele eshi hava kala ashike va mwena komaumbo. “Ovanyasha nava kale tava talele po oipangelo aishe yepangelo opo va pule ouyelele kombinga nghee ovaxungimwenyo hatu longo. Okukonga ekwafo oshi dulife eshi omunhu te likufa omwenyo,” Kalunduka ta ti.
Okwa yelifa ta ti ohava yandje omayakulo exungomwenyo momaupyakadi a yooloka ngaashi ovo ve li momakwatafano opaihole taa shongola, oshinyenu shonghalo yokuhe na oilonga nosho tuu.
“Otwa kwafela ovanhu vahapu kwa li ve na omaupyakadi eshi hava kala a lushe va hala oku li kufa eemwenyo noshoyo ovakainhu hava kala va hala okulongela omaludalo avo ominyonena.
Onghee oshiwana osha pumbwa okukala she li nekelela ovaxungimwenyo omaupyakadi avo shaashi ovaxungimwenyo ova deulilwa oshilonga osho,” ta holola.
Okwa weda po ta ti kapena oupyakadi itau dulu okukandulukwa po, po ka pena oupyakadi hau kalele.
“Okuli kufa omwenyo ka kushi ekandule po lomukundu ndele okueta po omukundu meefamili,” Kalunduka ta ti.