Omulumenhu weedula 28, Fillemon Iyaalo Fillemon ota hokolola ta ti okwa tendwa nenghava moshipala komuhona waye eshi vati a dimbwa okupatulula eshina lokuninga omahaisa.

Oshiningwanima eshi osha ningwa mexuliloshivike kondingosho yedina The Village Bar i li modoolopa yaGrootfontein.

Fillemon oha longo mondingosho omo pamwe novakainhu vavali.

 “Tete omuhona wange okwa nhukila nge ndele ta kwata nge otaye nokonima okwa kufa emanya ta ti kutya ota denge nge. Okudja opo kwa tenda nge nenghava la shila shaashi okwa li nda ninga omalulumika moshipala,” ta hokolola.

Onghee okwa ti ke na vali ombili koilonga, yee iha kofa vali nawa eshi ha kala ashike te lipula kutya omolwashike omuhona waye e na oku mu ninga ngaho komesho yovalandi.

Okwa lombwela Kundana ta ti paife okwa kwatwa koumbada kutya pamwe natango omuhona waye ote mu lafula nenghava oshikando oshitivali.

“Onda hala omuhona wange a mangulula nge opo a fute nge oshimaliwa shange ndele handi fiye po onhele yoilonga yaye. Inandi hala okulongela omunhu e na omhepo yokudenga ovanailonga vaye nomanghava,” Fillemon ta ti.

Okwa ti konima eshi a dengwa okwa ka lopotela opolifi opo a futwe oshimaliwa shaye ashike opolifi oye mu lombwela kutya ita dulu okukwafelwa ngeenge ina patulula oshibofa.

“Inandi hala okupatululila omuhona wange oshibofa shaashi inandi hala a kwatwa po. Onda hala ashike okufutwa oshimaliwa eshi nda dengwa shaashi okwa ninga epuko,” ta hokolola.

Fillemon okwa ti okwa longela omuhona waye oule weedula mbali neemwedi nhatu ashike vati okwa kala ta li ta pi eshi hava kala tava tukwa komuhona wavo.

“Ohatu kala alushe tu na oshinyenu koilonga shaashi omuhona wetu okuhole oku tu umba omishe,” Fillemon ta ti.

Okwa ti ovanailonga vakwao ihava kala va manguluka ngeenge va mono omuhona wavo e uya po pondingosho eshi hava kala va tila okutendwa omanghava.

“Itandi dulu okukala nda tala omuhona wange shaashi naame pamwe ohandi ka kwatwa komhepo yoku mu denga nongonyo onghee eshi shiwa okufiya po onhele yaye nombili,” Fillemon ta ti.

Fillemon okwa ti ngeenge omuhona waye okwa dopa oku mu futa ota ka ya kouministeli wonghalonawa yovanailonga opo u kale wa ya mo eenyala moshikumungu eshi.

Eshi Kundana a kwatafana naAnanias Nangobe ou e li oye mwene wondingosho, okwa hokolola ta ti okwa tenda Fillemon enghava shaashi a teya eshina lokuninga omahaisa.

“Fillemon okwa kala shito ha teya eshina olo, onghee onda loloka okufuta oshimaliwa shihapu ngeenge andi ka pangelifa eshina,” Nangobe ta ti.

Okwa ti naashi osha eta opo a tende Fillemon enghava moshipala shaashi iha lombwelwa ngeenge ta pukululwa koilonga.

“Fillemon ina fimaneka oilonga eshi alushe he uya koilonga kwa laata, yee okuhole okulonga a kolwa,” Nangobe ta ti.

Nangobe okwa yelifa ta ti Fillemon eshi a ya kopolifi okwa pulwa ngeenge ota fiye po oilonga ashike okwa nyamukula kutya okwa hala okutwikila okulonga fiyo handi mu futu oshimaliwa shaye.

Okwa ti Fillemon okwa manguluka opo a fiye po onhele yaye nombili shaashi ina hala oinima ii noshoyo edina laye li kale alushe tali kakekwa.

fhamalwa@nepc.com.na