Ovakwapata novakalimo momukunda Iitananga mOkaku nopomudingonoko ova halukifwa koshiningwanima omo omukulupe womido 89 nomonamati womido 38 va xulifa kuyele oshivike eshi, vati ve limangeleka, konima yokuhaudafana.
Pokati komafyo ovakalimo moshitukuwa shaShana ava, opa pita eevili dihe fike po24.
Otaku hokololwa xe a kufa onghatu yokulimangeleka konima yokutanguna nomonamati, omanga omona vati e lidipaa eshi a uda efyo laxe. Ava ova tongololwa kutya ovo Kutondokwa Itamalo nomonamati Kaalushu Sandrah Itamalo. “Onde lidenga po eshi nda mona omushamane wange e li meemhango. Kakwa li taulike omadidiliko okulimangeleka,” osho omukulupe Ester Uushona oo a kanifa omusamene nomona moule weevili a hokolola nonghumwe nonoluhodi.
Ta ti kakele komusamene, omona Kaalushu okwali ngoo a popya kutya ote limangeleke ngeenge okwa kala ina pewa kuxe eengobe mbali dohango.
Pefimbo Kundana a talela po eumbo laKuutondokwa omonamati Reinhold Itamalo okwa hokolola ta ti xe okwa tanguna naKaalushu Osoondaxa konima eshi kwa li Kaalushu a lombwela xe kutya okwa hala okuhombola neudo.
Okwa ti Kuutondokwa okwa lombwela Kaalushu opo ohango yaye iteelele shaashi ongobe ei i li po ote ke i toma po kohango imwe yomepata lavo i li ko neudo.
“Tate okwe mu lumbwela kutya okwa ningwa xeona komukwapata umwe, onghee ongobe ei e na ote ke i toma po kohango yomutekulu. Okudja opo Kaalusha okwa tameka a handuka ta ti kutya tate ke mu hole, ashike aveshe kava li tava ulike omadidiliko okulikufa omwenyo, “ Reinhold ta hokolola.
“Omaandaxa tate okwa pita a yuka kodoolopa, omanga Kaalushu a shuna koilonga yaye kOndangwa oko ha longo mofitola,” ta ti.
Okwa hokolola ta ti Etivali efimbo longula Kuutondokwa okwe li tuwa e li meemhango mokatala, a fya. Reinhold okwa ti eshi Kaalushu a uda kutya xe okwa fya naye okwe limangelekela monduda yaye yokunangala kOndangwa, ongula yEtitatu. Kuutondokwa okwa fiya ko omukulukadi waye nounona. Omalongekido epako lavo oku li metifa.
Omupopiliko wopolifi moshitukulwa shaShana Warrant Frieda Shikole okwa kumaida oshiwana opo shi konge omakwafo kovaxungimwenyo, kopolifi ile ovafitaongalo ngeenge tashi hepekwa koupyakadi wopamadilaadilo. fhamalwa@nepc.com.na