WINDHOEK- Omupresidente Hage Geingob okwa hokolola kutya edhilaadhilo lyokuya po nomashina gwo kuhogolola ngoka haga ithanwa electronic voting machines (EVM) kalya li osheetwapo shaSwapo ashike Swapo okwa yambidhidha owala edhilaadhilo nokulitaamba ko.
Geingob dhoka okwedhi popi omanga a li ta popitha engathithi enene lyaaholi naayambidhidhi yoSwapo mboka yali ya gongala poshigongi shoSwapo koMariental moshitopolwa shaHardap mosoondaha ga zi ko.
Namibia okwa longitha omashina ngoka oshikando shotango tango pethimbo lyomahogololo gomomumvo 2014, ashike ngashingeyi yamwepo yomaakwashigwana oye na ompinge nomashina ngoka.
“Ngashingeyi aantu otaya kongo omapuko naampoka kaapu na omapuko. Ngashingeyi aantu otaya kongo nale omatompelo ngele oya kala inaya vena,” Osho a hokolola ngaaka.
Okwa hokolola ngaaka pethimbo ndyoka ta ti kutya Swapo ota sindana nonande omashina ngoka oga longithwa nenge ina ga longithwa oshoka oya ilongekidhila nale omahogololo.
“Ondiwete kutya ope na nale ombepo ya puka yaantu taya kongo uupuko waathele. Yamwe otaya ti kutya itaya sayina, taya kongo omatompelo. Oongundu dhoompilameno odhili po nale dha tengeneka kutya itaya vene oma hogololo. Tse ka tu na ko nasha nande na onda lombwela amushanga gwetu gwoSwapo kutya ina pumbwa okuuva nayi onkee tse out na ashike oku sindana,” Osho Geingob a hokolola ngaaka omanga ta umbu omushe. MOlyomakaya ga zi ko ongundu yaakwashigwana oya ningi omunyanyo gwo pambili gwa thinda kombelewa yinasha nomahogololo yoElectoral Commission of Namibia opo yi gandje omakemo gawo kutya yo inaya hala omashina ngoka ga longithwe pethimbo ndika lyomagohololo ndyoka twataalela ngashingeyi.
Omunyanyo ngoka ogwali gwa kwatelwa komesho unene kaayambidhidhi yokandindate yi ithikamena, Panduleni Itula.
Mboka ya nyanya unene aagundjuka mboka ya holola omadhilaadhilo gawo kutya omanga pe na e hokololo kutya ope na omashina gwokuhogolola gali ga yakwa po kape na we eyinekelo lya kola kutya omahogololo ngoka otaga ka kala gamanguluka nogeli pauyuki.