New Era Newspaper

New Era Epaper
Icon Collap
...
Home / Ookalyamupombo va ponokela ondingosho nokudenga ovanhu

Ookalyamupombo va ponokela ondingosho nokudenga ovanhu

2022-08-12  Festus Hamalwa

Ookalyamupombo va ponokela ondingosho nokudenga ovanhu

Ondingosho yoEmirates i li mOngwediva oya ponokelwa kookalyamupombo nokudenga omukeeleli womaliko, omulandi a hangika pondingosho noshoyo omunailonga.

Oshiningwanima eshi osha ningwa Etine lwopotundi 01h20 pefimbo kwa li ondingosho ya patuluka.

Omupopiliko wopolifi mOshana Inspector Thomas Aiyambo okwa hokolola ta ti ovafekelwa okwa li ve kwete eembele, omakatana noshoyo eendjebo tava ningile ovanhu omatilifo.

Vati tete ovafekelwa ova nhukila omukeeleli womaliko tava ti kutya na nangale pedu ndele tave mu kufa ondjebo yaye noku mu denga nomanghava.

Okudja opo omulandi umwe womulumenhu okwe uya opo ngeno a amene omukuleli womaliko ashike ine shi pondola eshi naye a dengwa.

Opolifi oya ti nokonima ovafekelwa ova ya komukainhu ou ha longo mondingosho ndele tave mu denge.

Ovafekelwa ova kufa mo omashina ane, oimaliwa noshoyo oshimaliwa keemuma ashike inaku shivika kutya oshimaliwa oshi fike peni.

Oonakuninga oshihakanwa aveshe ova twalwa koshipangelo shaShakati konima eshi va mona oshiponga.

Opolifi oya ti ovafekelwa okwa li tava shingi otuwa yoCarolla itoka ashike eenomola dayo ina i konekwa.

Opolifi oya weda po tai ti okwa didilikwa otuwa yoCarolla itoka hai kala tai nyeke ovanhu omaliko avo momudingonoko waNgwediva.

Onghee oshiwana otashi kunghililwa opo shi kale sha kotoka ngeenge sha mono otuwa itoka yoCorolla.

Lopokati opo omukwashiwna waChina naye okwa ponokelwa kookalyamupombo omulongo ve kwete eembele neendjebo pefimbo loufiku meumbo laye eshi a hangika a kofa.

Oshiningwanima eshi osha ningilwa koBrakwater moshitukulwa shaKhomas.

Nakuninga oshihakanwa okwa kufwa eengodi dopeke heyali noshoyo oshimaliwa N$5 000.

Opolifi oya hokolola tai ti nakuningna oshihakanwa okwa hangika meumbo nomunailonga waye womulumenhu hava di naye.

Vati ovafekelwa ova manga tete komesho nakuninga oshihakanwa ndele tave mu denge tava pula oshimaliwa.

Okwa twalwa koshipangelo shaKatutura konima eshi a monifwa oshiponga.

Omukwashiwana waChina naye umwe okwa ponokelwa koolyamupombo vahamano meumbo laye koHockland Park moWindhoek ndele tave mu kufa omaliko aye.

Nakuninga oshihakanwa okwa kufwa oshimaliwa shomilliona N$1.1, eengodi nhee dopeke noshoyo eekompiuta nhatu.

Kape na omufekelwa a kwatwa po moibofa aishe youmbudi onghee omakonakono opolifi otaa twikile. – fhmalwa@nepc.com.na


2022-08-12  Festus Hamalwa

Share on social media