Home / Opolisi Oya Futithwa Oomiliyuna kAakwashigwana Opolisi Oya Futithwa Oomiliyuna kAakwashigwana
"WINDHOEK Omadhengo gopolisi oshowo omaihumbatonayi gayo oga etitha Opolisi yaNamibia yi futile aayonenwa, shoka she yi pula okapandi koshimaliwa shivulithe N$1.6 million pashimaliwa shOpolisi shomumvo 2005/2006. Okapandi N$1 665 844.94 oka longithwa okufutila iihakanwa yomadhengo nomayonagulo guuthemba womuntu, moka iipotha yopashigwana 105 yokufutilwa ya tulwa mo kaakwashigwana mboka ya fala epangelo kompangu. Ominista yEgameno nEpopilo lyOshigwana, Peter Tsheehama pethimbo ta popitha aanambelewa aakuluntu oshowo mboka yopokati mOpolisi omasiku ga zi ko, okwe shi holola kutya uuministeli we owa taalelwa kiipotha yopashigwana tayi ziilile mokukwata po aakwashigwana shaa li paveta, eedhililo, omadhengo nokuhadhahadha shaa li paveta. Omolwiilonga mbyoka epangelo olya futithwa nomolunyala omiyalu ominene dhiimaliwa. Minista okwa gunu aanambelewa ya kotoke omvula ndjika opo ku yandwe omapuko ngoka ga ningwa nale noku ya indila ya kaleke po oohedhi oombwanawa ""dhopolisi oshowo ondholongo."" Andola kasha li omaihumbato inaga tegelelwa gaapolisi yamwe oshowo okwaanevuliko kwawo, minista ta ti, ngeno oshimaliwa shi thike mpoka osha longithwa po moompumbwe dhilwe dhoshikondo shopolisi. Tsheehama okwiindile aanambelewa aakuluntu metanga lyokukaleka po oveta nelandulathano ya konakone iinima nuukeka, ta ti aapolisi ngele oya pumbwa okudheulululwa shi nasha neihumbatonawa pailonga, nena onkatu ndjika nayi katukwe. Oshoka eihumbatonawa olyo esipa lyombunda lyehangano kehe lyaanambelewa haya zala ounifoloma. Minista ti indile opolisi naanambelewa yondholongo ya kaleke po ombepo yeihumbatonawa, oohedhi dhuudhiginini, uushili, iilonga ya ndjunguka nuuyuuki. Nonande paempito dhimwe aanambelewa mbaka ohaya longo moonkalo dha nika omahongololo, minista okwe ya indile kaa ya gwile momwigo gokanyala kiilonga yuudhudhu, uulingilingi, oombumbo nokulongela kumwe noonkwatwa, okulongitha iingangamithi ngaashi omapangwe nokuyakela ooselulla moondholongo nosho tuu. ""Uupakete utatu wepangwe owa yakelwa mondholongo komunambelewa gumwe, ooselula odhindji odha yugwa ko moondholongo. Otwa hala ekondololo lya ndjunguka naamboka ye na oshinakugwanithwa, ngele itaya gwanitha po iilonga yawo, tse otatu ke ya tu kondolole,"" minista lombwele aanambelewa aakuluntu. Tsheehama okwa takele omunwe aanambelewa mboka haye ya kiilonga ya laata, ta ti shika itashi ki idhidhimikilwa we, naamboka taya ka monika ondjo mushika otaya ka ungaungwa nayo pwaa na ohenda. ""Ne aanambelewa aakuluntu mopolisi noondholongo, onda hala mu vulikithe iilyo yeni. Omu na okugandja iiholelwa iiwanawa kiilyo yeni. Omu na oku shi koneka kutya ne omu li iilyo yetanga lyokukaleka po oveta nelandulathano."" Minista okwa londodha wo kutya aanambelewa aakuluntu mboka taya ka ndopa okugwanitha po iilonga yawo otaya tidhwa miilonga. ""Mboka ya tidhwa miilonga uupyu ohaye ke wu uva ashike konima yoomwedhi ndatu sho oondjambi dhawo dha sitopa. Ohandi mono omaindilo ogendji okuza kumboka ya tedhatidhwa miilonga ya hala okugaluka. Omolwashike oshikondo shika shi na okugalulila mo aantu ye na omikalo omiwinayi?"" Aanambelewa paendondo adhihe otayi indilwa neitulomo enene ya lundulule omikalo dhawo nokulonga neihumbatonawa omathimbo agehe. Omitse ominene mOshikondo shika dhoka dha gongala poshipopiwa shoka ongaashi Omupehaminista Gabes Shihepo, Amushanga Omukuluntu Peter Mwatile, Komufala gOondholongo Evaristus Shikongo naInspekta Omukuluntu gOpolisi Sebastian Ndeitunga."
Your experience on this site will be improved by allowing cookies.
